SQO-ǵa jyl sońyna deıin Eýropadan 5 myń asyl tuqymdy iri qara jetkizilmek

PETROPAVL. QazAqparat – Soltústik Qazaqstan oblysynda jarty jyldyń ishinde et-sút óndirisi artyp, mal basy kóbeıdi, dep habarlaıdy QazAqparat tilshisi.

Búgin SQO Aýyl sharýashylyǵy jáne jer qatynastary basqarmasynyń basshysy Erbolat Bekshenov brıfıng ótkizip, mal sharýashylyǵyna qatysty jarty jyldyń qorytyndysyn shyǵardy.

Búginde oblysta 478,5 myń qara mal, 603,3 myń qoı-eshki, 234,9 myń shoshqa, 177,2 myń jylqy jáne 5,6 mln qus bar. Jarty jyldyń ishinde et óndirisi 8,5% artyp, 38 myń tonna ónim óndirildi. Sút óndirisinde de ósim bar, shamamen 5,4% artqan. ıAǵnı jyl basynan 268,9 myń tonna sút saýylǵan.

«Óńirde saýyn sıyrdyń basyn kóbeıtý mindeti tur. Qazir sút óndirisimen aınalysatyn 870 sharýashylyq bar. Onyń 8-i zamanaýı sút keshenderi. Memlekettiń qoldaýy arqasynda sońǵy eki jylda qoldanysqa berildi. Óńir basshysy Qumar Aqsaqalovtyń tapsyrmasyna oraı taǵy 5 aýdanda zamanaýı 10 sút fermasynyń qurylysy júrip jatyr. Onda 6 myńǵa jýyq mal bolady», - deıdi Erbolat Bekshenov.

Aýqymdy jobany júzege asyrýǵa 14 mlrd teńge qarjy bólingen. Sút fermalary iske qosylǵan jaǵdaıda qosymsha 30 myń tonna sút óndirilip, 200 jumys orny ashylady.

Qyzyljar aýdanynda 1 myń basqa arnalǵan et óndirý fermasy, Aıyrtaý, Aqjar jáne Ýálıhanov aýdandarynda bordaqylaý alańdary salynyp jatyr. Jalpy, 23 myń basqa arnalǵan. Aqjar aýdanyndaǵy sharýashylyqqa tamyz aıynda 800 iri qara mal Irlandııadan jetkizilmek.

«Qazirgi ýaqytta elimizde karantındik shekteý sharalary engizilgen. Soǵan qaramastan asyl tuqymdy maldy sharýashylyqtar Eýropadan, Germanııadan ákelip jatyr. Osyǵan deıin 966 sıyr ákelindi. Fermerler kerek maldy qashyqtan beınebaılanys arrqyly tańdap alyp, jetkizýshilerge tapsyrys beredi», - deıdi basqarma basshysy.

Jalpy jyl sońyna deıin SQO-ǵa shetelden 5 myń asyl tuqymdy qara mal jetkizilmek.