SQO-ǵa sońǵy jyldary 2 myńnan astam otbasy qonys aýdarǵan
«Eńbek» nátıjeli jumyspen qamtý jáne kásipkerlikti damytý baǵdarlamasy arqyly SQO-ǵa sońǵy jyldary 2 myńnan astam otbasy qonys aýdarǵan. Alaıda solardyń 140-y qaıta kóship ketken.
«2020 jyldyń maýsymyna deıin kelisimshart boıynsha qonys aýdarýshylar óńirde 1 jyl turýy tıis. Endi bul merzim bıyldan bastap 5 jylǵa uzartyldy. Osy merzimnen keıin ereje boıynsha azamattar otbasylyq jaǵdaıyna jáne aýa raıynyń jaqpaýyna baılanysty kóship kete alady. Munaıda qarjy qaıtarylmaıdy. Basqa jaǵdaıda erikti túrde memleket bergen sýbsıdııalardy qaıtarady», - deıdi SQO jumyspen qamtýdy úılestirý jáne áleýmettik baǵdarlamalar basqarmasynyń basshysy Almaz Qoshmanov.
Ár qonys aýdarýshyǵa 70 AEK kóleminde sýbsıdııa tólenedi. Baspana jaldaý úshin bir jyl boıy aı saıyn 87 myń teńge beriledi.
SQO ákiminiń keńesshisi Ábdiǵanı Bázilhanulynyń aıtýynsha, baǵdarlamany jetildiretin tustary kóp.
«Kóship kelgenderge memleketten jaqsy kómek bar. Alaıda kelisimde kórsetilgen merzim aıaqtalǵan soń, olar ketip qalady. Jalpy bul – óte qajet baǵdarlama. Munda úlken saıasat jatyr. Qonys aýdarýshylar «aqsha alyp, jaǵdaıymdy jaqsartamyn» dep emes, «osy jerdiń ıesi bolamyn, paıdamdy tıgizemin» degen uǵymmen kelýi kerek. Bir baıqaǵanym, kóbine jumysqa ornalasa almaǵandar ketip jatyr. Jalpy baǵdarlamanyń olqylyqtar kóp. Máselen úıdi satyp alý quqyǵy bar, salý quqyǵy joq», - deıdi Ábdiǵanı Bázilhanuly.