SQO-ǵa qonys aýdarýshylarǵa bıyl 886,5 mln teńge shamasynda tólem jasaldy

<p>PETROPAVL. KAZINFORM &ndash; Soltústik Qazaqstan oblysyna jyl basynan beri jumys kúshi artyq óńirlerden 288 otbasy jáne qandastardan 55 otbasy qonys aýdarǵan.&nbsp;</p>

SQO Eńbek utqyrlyq ortalyǵynyń málimetinshe, óńirge qonys aýdarǵandardyń jalpy sany – 939 adam. Olarǵa 886,5 mln teńge shamasynda sýbsıdııa berilse, sonyń 211 mln teńgesi kóshýge, 103,5 mln teńgesi páter jaldaýǵa jáne 571 mln teńgesi qalǵan shyǵyndaryna jumsalǵan, onyń ishinde otbasynyń ár múshesine beriletin 70 AEK mólsheri somasyndaǵy bir rettik tólem de bar.

«Qazirgi ýaqytta eńbek utqyrlyq ortalyǵy janynan konsýltatsııalyq, aqparattyq, aýdarma, bilim berý jáne basqa da beıimdeý qyzmetterin kórsetý maqsatynda qandastar men qonys aýdarýshylardy beıimdeý jáne ıntegratsııalaý bólimi ashyldy. Bólimniń negizgi mindeti – óńirge kelgen qandastar men olardyń otbasy múshelerin ýaqytsha ornalastyrý ortalyǵyna ornalastyrý. Kóship kelýshiler munda ýaqytsha jáne tegin turady. Al, etnıkalyq qazaq jáne onyń otbasy músheleri qandas mártebesin alǵanǵa deıin ortalyqta turady, qonys aýdarýshy jáne onyń otbasy músheleri jumys berýshimen eńbek shartyn jasasqanǵa deıin, biraq kúntizbelik 10 kúnnen aspaıtyn merzimde tura alady», - deıdi SQO eńbek utqyrlyq ortalyǵynyń mamandary. 

Qandastar men olardyń otbasy múshelerine sondaı-aq aqparattyq jáne anyqtamalyq qyzmetter, aýdarma boıynsha qyzmetter, jumysqa ornalasýǵa, kásiptik daıarlaýǵa, qaıta daıarlaýǵa jáne biliktiligin arttyrýǵa kómek tegin kórsetiledi. Budan bólek qandastarǵa Qazaqstan Respýblıkasynyń tarıhy, mádenıeti men dástúrleri, zańnama negizderi jáne shaǵyn bıznes ashý boıynsha oqytý kýrstary uıymdastyrylady. Qazaqstan azamattyǵyn alý jáne qujattandyrý máselelerin sheshýge de kómek beriledi. 

Buǵan deıin Petropavldan Shymkentke turaqty áýe reısi ashylatynyn jazǵan edik.