SQO-ǵa kómekke kelgen Túrkistan oblysynyń qutqarýshysy qaıtys boldy

<p>PETROPAVL. KAZINFORM &ndash; Soltústik Qazaqstan oblysynyń Taıynsha qalasyna sý tasqynymen kúreske kómekke kelgen túrkistandyq qutqarýshy - azamattyq qorǵaý praporşıgi Bekjan Baldanov kenetten qaıtys boldy. &nbsp;</p>

SQO Tótenshe jaǵdaılar departamenti baspasóz qyzmetiniń málimetinshe, 2 sáýirge qaraǵan túni 45 jastaǵy Bekjan Baldanov Taıynsha qalasyndaǵy aýdandyq aýrýhananyń reanımatsııa bólimine túsken. Alaıda dárigerler onyń ómirine arasha túse almady. Ólimge jiti mıokard ınfarktisi sebep bolǵan.

Er adam Túrkistan oblysy TJD Órt sóndirý jáne avarııalyq-qutqarý jumystary qyzmeti Saıram aýdanynyń № 6 órt sóndirý bóliminiń bólimshe komandıri bolyp eńbek etken. 

Bekjan Baldanov Taıynsha qalasyna 1 sáýirde Túrkistan oblysynyń kúshteri men quraldary tobynyń quramynda sý tasqynyna qarsy is-sharalardy ótkizýge kómek kórsetý úshin keldi. Sol kúni keshke ózin nashar sezinip, keıin aýrýhanaǵa túsken. Petropavldaǵy aýrýhanaǵa jatqyzý úshin sanavıatsııamen jetkizilmek bolǵan. 

«Tótenshe jaǵdaılar mınıstrligi, Tótenshe jaǵdaılar departamenti jáne Soltústik Qazaqstan oblysynyń ákimdigi komandırdiń mezgilsiz qaıtys bolýyna baılanysty týystary men jaqyndaryna, áriptesterine qaıǵyryp kóńil aıtady», - delingen habarlamada. 

Marqumnyń denesi týǵan jerine jetkizildi.