SQO-ǵa kóktemgi sý tasqynyna baılanysty Túrkistan oblysynan kómek kele jatyr
SQO Tótenshe jaǵdaılar departamenti bastyǵynyń orynbasary Murat Qanǵojınov óńirdegi sý tasqyny jaǵdaıyna baılanysty aqparatpen bólisti. Úlken sý oblysqa áli jete qoıǵan joq.
«Petropavldaǵy Jumysshy kentinde 12 úıge erigen qar sýy kirdi. Turǵyndar evakýatsııalanǵan joq, arnaıy tehnıkamen sý soryldy. Bir baspanaǵa brneshe ret sý kirý faktileri boldy. Aqjar aýdany Shat ózeniniń arnasynan shyǵýyna baılanysty Talshyq aýylynyń 22 úı turǵynyn jáne maldy evakýatsııalaýǵa týra keldi. Muz keptelisin boldyrmaý úshin túni boıy jumys istep, nátıjesinde sý úılerge kirgen joq», - deıdi Murat Qanǵojınov.
Al ótken túndi mamandar dalada ótkizdi. Taıynsha aýdanynda qaýipti jaǵdaı týyndady.
«Aqmola oblysy Alekseevka eldi mekenin sý basý qaýpi týǵandyqtan, kólemi 3 mln tekshe metr bolatyn gıdrotehnıkalyq qurylystan sý jiberýge sheshim qabyldandy. Saldarynan sýdyń bir bóligi bizdiń oblysqa jiberildi. Bul jumys saǵat 17.00-de bastaldy, sý Taıynsha aýdanyna keshke qaraı jetti. Departament qyzmetkerleri jergilikti atqarýshy bılik, polıtsııa qyzmetkerleri oqıǵa ornynda boldy. Turǵyndar aldyn ala eskertildi. Saǵat 23.00-de evakýatsııalaýǵa qajet tehnıka daıyn turdy. Biraq turǵyndar aldyn ala qaýipsiz jerge barýǵa bas tartty. Túni boıy jaǵdaı baqylaýda boldy. Injenerlik tehnıka sýdyń jolyn bógeýmen aınalysty. Qazirgi ýaqytta kelgen sýdyń deńgeıi túse bastady. Sý úılerge jetken joq. Taıynsha qalasynyń aınalasynda bóget bar. Ol 2017 jylǵy sý tasqynynan keıin salynǵan, uzyndyǵy 6 km, bıiktigi 1 metr», - deıdi Murat Qanǵojınov.
26 naýryzdan bastap departamentte táýlik boıy jedel shtab jumys istep jatyr.
«Bizdiń mobıldi toptar Ǵabıt Músirepov atyndaǵy aýdannyń Rýzaevka, Tahtabrod eldi mekenderine, Ýálıhanov aýdanynyń Qýlykól, Qaratal aýyldaryna jóneltildi. Bul aýdanda da qaýip joǵary. Sileti sý qoımasynan sý jibergen jaǵdaıda, aýyldy sý basýy múmkin. Keshe oblys ákimi arnaıy qyzmettermen óńirdiń sý basý qaýpi joǵary aýdandaryn tikushaqpen baqylady. Ýálıhanov, Aqjar, Taıynsha aýdandarynda qar jaqsy erigen. Al Ǵ.Músirepov, Taıynsha, Aıyrtaý aýdandarynda qar áli tutasyp jatyr, biraq alqaptarda sý jınala bastaǵan. Qostanaı jáne Aqmola oblystarymen shekaralas jatqan aýdandarǵa monıtorıngti kúsheıttik. Óıtkeni bul oblystar bizdegi sý tasqyny jaǵdaıyna áser etedi. Qazir Túrkistan oblysynan bizge kómekke mobıldi toptar, ıaǵnı 54 adam, 12 arnaıy tehnıkamen kele jatyr. Olar oblystyń bes aýdanyna jiberiledi», - deıdi departament bastyǵynyń orynbasary.
Mamannyń aıtýynsha, kún jylynǵaly oblysta 12 ret jol ýchaskesin sý basty. Onyń tórteýi respýblıkalyq mańyzy bar jolda, ekeýi oblystyq, qalǵandary – jergilikti joldarda boldy. Qazirgi ýaqytta 8 jolda jaǵdaı qalypqa keldi.
«Osy aptanyń sońynda óńirde sý tasqyny sharyqtaý shegine jetpek. «Qazgıdromet» RMK boljamynsha, erteńnen bastap kún jylynady, beısenbi kúni aýa temperatýrasy +12,+17 gradýs aralyǵynda bolmaq. Jalpy, jyldaǵy tájirıbege súıenip aıtar bolsaq, bıyl biz úshin qolaıly aýa raıy saqtalyp tur, túnde -5,-6 gradýs shamasynda. Bul qardyń kúrt erýine jol bermedi», - deıdi Murat Qanǵojınov.