SQO-ǵa kelgen 15 dárigerge 2,5 mln teńgeden kótermeaqy berildi

PETROPAVL. QazAqparat – Soltústik Qazaqstan oblysyna bıyl 38 dáriger kelse, solardyń 23-i ózderine tıesili 1,5 mln jáne 2,5 mln teńgeden kótermeaqy aldy, dep habarlaıdy QazAqparat tilshisi.

SQO-da dárigerler jetispeýshiligin joıý maqsatynda jergilikti bıýdjetten kótermeaqy qarastyrylǵan. Petropavlda qalyp isteıtinderge 1,5 mln teńge, aýylǵa baratyndarǵa 2,5 mln teńge beriledi. Oblystyq densaýlyq saqtaý basqarmasynyń málimetinshe, emdeý mekemeleri jyl basynan beri 38 dárigerdi qabyldady.

«Óńirge kelgen 38 dárigerdiń 15-i kótermeaqy alý úshin qujattaryn rettep jatyr, qalǵan 23-ine tólem jasaldy. Onyń 8-ine 1,5 mln teńgeden berildi. Qalǵan 15 dáriger 2,5 mln teńgeden aldy. Sonymen qatar, olardyń jalǵa alǵan páteri aqysynyń 50%-y tólenedi. Ońtústik óńirlerden kelgender kóshi-qon baǵdarlamasyna da qatysa alady. Al, eldi mekenderge baratyn dárigerler «Dıplommen aýylǵa» baǵdarlamasy arqyly bólek kótermeaqy ala alady», - deıdi SQO densaýlyq saqtaý basqarmasynyń baspasóz hatshysy Gúlnar Qalıeva.

Jumysqa qabyldanǵandardyń arasynda joǵary oqý orynnyń bıylǵy túlekteri de bar. Solardyń biri – Muhammadalı Babahanov Túrkistandaǵy Qoja Ahmet ıAsaýı atyndaǵy halyqaralyq qazaq-túrik ýnıversıtetiniń medıtsına fakýltetin bitirgen. Jalpy tájirıbe dárigeri №2 qalalyq emhanaǵa jumysqa ornalasty.

«Meniń ýchaskemde 1,5 myńnan astam adam bar. Qazir turǵyndar negizinen tynys alý júıesi aýrýlarymen qaralady. JRVI-men keletinder bar. Jastaryna qaraı skrınıngterge jiberemiz», - deıdi ol.

Óńirde qazirgi ýaqytta 300-ge jýyq dáriger jetispeıdi. Negizinen emdeý mekemelerine terapevt, hırýrg, akýsher-gınekolog jáne reanımotolog kerek. Bul máseleni sheshý úshin jergilikti bıliktiń qoldaýymen rezıdentýrada mamandar daıarlanyp jatyr. Olardyń 58-i jyl sońyna deıin oqýyn aıaqtap, jumysqa kirispek.