SQO-ǵa eki aıda shekara arqyly koronavırýs juqtyrǵan 201 adam kirgen

PETROPAVL. QazAqparat – Soltústik Qazaqstan oblysyna tek eki aıdyń ishinde Reseıden koronavırýs juqtyrǵan 201 adam kirdi, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, KVI juqtyrǵandardyń ishinde syrttan kelgender kóp.

Onyń basym bóligi – Reseıden kelgen.

Máselen 6 qazan men 9 jeltoqsan aralyǵynda Reseıden avtomobıl joldaryndaǵy shekara beketi arqyly 33,5 myń adam ótken.

Jaıaý ótken 8900 adamnyń qolynda PTR test qorytyndysy bolǵan. Al 1991 adam, olardyń barlyǵy el azamattary, anyqtamalary bolmaǵandyqtan karantın statsıonaryna ornalastyryldy.

Sol jerde COVID-19 zerthanalyq zertteý júrgizildi. 201 adamnyń qaýipti ınfektsııany juqtyrǵany anyqtalyp, 21-i ınfektsııalyq statsıonarǵa jatqyzyldy.

Qalǵany ambýlatorlyq em alýǵa jiberildi.

Sheteldik 252 azamatqa shekara arqyly ótýge tyıym salyndy. Olardyń qolynda PTR-test qorytyndysy bolmaǵan.