SQO ákimdiginiń málimetinshe, óńirge Chehııa Parlamenti depýtattar palatasy tóraǵasynyń orynbasary ıAn Bartoshek jáne Qazaqstandaǵy Chehııanyń Elshisi Pavol Shepelıak jumys saparymen keldi. Ákimdikte ótken kezdesý barysynda ekijaqty áriptestik jaıy sóz boldy. Eki el arasynda ásirese aýyl sharýashylyǵy salasynda yntymaqtastyq ornaǵan.
— Chehııa bıznesin Soltústik Qazaqstan oblysyndaǵy ınvestıtsııalyq jobalarǵa qatysýǵa shaqyrdym. Bizdiń óńir ashyq dıalogqa jáne birlesken perspektıvaly bastamalardy iske asyrýǵa daıyn. Seriktestigimiz nyǵaıa túsetinine senimdimin. Sonymen qatar, Prjevalskıı tuqymdy jylqylaryn Eýropa elderinen, sonyń ishinde Chehııadan, tarıhı Otanyna — Qazaqstanǵa qaıtarý boıynsha kelisimder aıasynda júrgizilip jatqan mańyzdy jumysty erekshe atap óttim. Bul — tarıhı jáne tabıǵı murany saqtaý jolyndaǵy mańyzdy qadam. Óıtkeni, dál Soltústik Qazaqstan oblysy — Botaı mádenıetine tán osy biregeı jylqylardyń qolǵa úıretilgen otany bolyp sanalady, — dedi oblys ákimi Ǵaýez Nurmuhambetov.
Chehııa delegatsııasy Petropavldyń tarıhı nysandary men kórnekti oryndaryn aralady. Ásirese, zaýyt aýmaǵynda saqtalǵan kazarmalar erekshe qyzyǵýshylyq týdyrdy — kezinde bul jerde chehoslovak legıonerleri ornalasqan bolatyn.
Buǵan deıin Chehııada jańa memlekettik vızýaldyq stıl bekitiletinin jazǵan edik.