SQO-ǵa bıyl ońtústik óńirlerden qansha adam kóship keledi
SQO jumyspen qamtýdy úılestirý jáne áleýmettik baǵdarlamalar basqarmasynyń málimetinshe, byltyr jumys kúshi artyq óńirler - Túrkistan, Almaty, Jambyl, Qyzylorda, Mańǵystaý oblystarynan jáne Nur-Sultan, Almaty jáne Shymkent qalalarynan oblystyń 139 eldi mekenine 784 otbasy, 2943 adam den kóship keldi. Olar oblystyń barlyq aýdandary men Petropavlǵa ornalastyryldy. Sondaı-aq qonys aýdarýshylardy qabyldaý kvotasyna engizildi. Kóship kelgen 784 otbasynyń 74% aýyldyq jerlerde, qalǵany qalada turyp jatyr.
«2 943 adam qonys aýdarsa, sonyń eńbekke qabiletti jastaǵysy 1 316 adam, 720 adam turaqty jumys oryndaryna ornalastyryldy, al 215-i kásipkerlikpen aınalysyp jatyr. 129 adam áleýmettik demalysta. Bıyl azamattardy kóshirý «Qýatty óńirler-el damýynyń draıveri» ulttyq jobasy aıasynda jalǵasady. 2022 jylǵa 2685 adamǵa kvota bekitilgen, onyń ishinde jumys kúshi artyq óńirlerden 2556 adam kelmek. Al 129 azamattyń qandas mártebesi bar», - deıdi SQO jumyspen qamtýdy úılestirý jáne áleýmettik baǵdarlamalar basqarmasy bastyǵynyń orynbasary Rınat Eljasov.
Jyl basynan óńirge 449 adam – 114 otbasy qonys aýdardy. Olardyń 170-i – eńbekke jaramdy, 94 adam jumysqa ornalassa, bireýi óz isin bastaǵan.
Mamannyń aıtýynsha, búgingi tańda oblysta eńbek naryǵynda mamandarǵa suranys joǵary. Elektrondyq eńbek bırjasynda 2,5 myńnan astam bos jumys orny tirkelgen.
«Byltyr oblysqa 65 qandas qonys aýdardy. Olar Qytaı Halyq Respýblıkasynan, Mońǵolııadan, Ózbekstannan, Reseı men Irannan keldi.
Bıyl 129 adamdy qabyldaımyz dep otyrmyz. Jyl basynan 23 otbasy – 45 adam keldi. Olardyń 17-si – eńbekke qabiletti. Toǵyzy jumysqa ornalastyryldy. Ózbekstannan 13 otbasy, Reseıden – 6, Qytaıdan – 3 jáne Irannan 1 otbasy kóship keldi», - deıdi Rınat Eljasov.