SQO-ǵa bıyl 3 myńǵa jýyq adamdy kóshirý josparlanǵan

PETROPAVL. QazAqparat – Soltústik Qazaqstan oblysyna jumys kúshi artyq óńirlerden 2 660 adamdy jáne 138 qandasty kóshirý josparlanǵan, dep habarlaıdy QazAqparat tilshisi.

Óńirlik kommýnıkatsııalar qyzmetinde SQO jumyspen qamtýdy úılestirý jáne áleýmettik baǵdarlamalar basqarmasynyń basshysy Rınat Eljasov azamattardyń jekelegen sanattaryna memlekettik qoldaý kórsetý boıynsha atqarylyp jatqan jumyspen tanystyrdy.

SQO azamattardy jumys kúshi artyq óńirlerden kóshirý boıynsha baǵdarlamaǵa belsendi qatysyp keledi.

Mamannyń aıtýynsha, byltyr kvotaǵa sáıkes 2 556 adam nemese 681 otbasy jumys kúshi artyq óńirlerden keldi.

«Eńbekke qabiletti 974 adamnyń 820-sy nemese 84% jumyspen qamtyldy, onyń ishinde turaqty jumys oryndaryna – 652 adam qabyldansa, kásipkerlikpen 168 adam aınalysyp jatyr, onyń 111-i 136 mln teńgege óteýsiz granttar men kredıtter aldy.

Kelgenderdiń ishinde 1252 – bala, 66 stýdent jáne 63 zeınetker bar. Dekrettik demalysta 201 áıel otyr», - deıdi Rınat Eljasov.

Bıyl da bul baǵdarlama jalǵasady.

«Qazirgi ýaqytta olardy qonystandyrý úshin eldi mekenderdiń tizbesi bekitildi. Kelgen azamattarǵa materıaldyq kómek kórsetý, onyń ishinde kóshýge jáne turǵyn úıdi jalǵa alýǵa sýbsıdııalar tóleý kózdelgen.

Sondaı-aq, bıyl turǵyn úı satyp alý, salý úshin ekonomıkalyq utqyrlyq sertıfıkatyn nemese 4 mln teńgege deıingi mólsherdegi ıpotekalyq turǵyn úı qaryzdary boıynsha bastapqy jarnany usyný kózdelgen», - deıdi basqarma basshysy.

Jyl basynan beri oblysqa jumys kúshi artyq óńirlerden 148 otbasy - 483 adam qonys aýdardy. Kóship kelgenderdiń 31% Astana qalasynan, 26% Túrkistan oblysynan jáne 11% Shymkent qalasynan kelgen.

Qandastardyń 25 otbasy nemese 48 adam kóship keldi. Sonyń ishinde Reseıden 18 otbasy - 24 adam, Mońǵolııadan 3 otbasy - 13 adam, Irannan 2 otbasy - 6 adam, Ózbekstannan 4 múshesi bar bir otbasy jáne Qyrǵyzstannan bir adam qonys aýdardy.

«Eńbek jáne áleýmettik qorǵaý mınıstrligimen birlesip, 2023-2025 jyldarǵa arnalǵan qonys aýdarýdy yntalandyrý jónindegi jol kartasy ázirlendi.

Osy karta aıasynda 3 jyl ishinde memlekettik qoldaý sharalaryn kórsete otyryp, 8 myńnan astam adamdy kóshirý josparlanǵan. Osy jyldar ishinde barlyǵy 3 myńnan astam jańa jumys ornyn qura otyryp, 11 ınvestıtsııalyq jobany iske asyrý mindeti tur. Óńirde kadrlarǵa qajettilik bar.

Bul jumys oryndaryna jergilikti turǵyndar da jumysqa ornalasa alady, olarǵa da jumys beriledi», - deıdi Rınat Eljasov.