SQO-ǵa bıyl 124 myńnan astam týrıst kelgen
Óńirlik kommýnıkatsııalar qyzmetinde SQO-nyń kásipkerlik jáne ındýstrııalyq-ınnovatsııalyq damý salasynyń bıylǵy jumysy qorytyndylanyp, keler jylǵa josparlary aıtylǵan baspasóz máslıhaty ótti. Basqarma basshysynyń orynbasary Danııar Isaevtyń aıtýynsha, koronavırýs indetine qaramastan óńirge kelgen týrıster sany artqan. Bıyl oblysqa toǵyz aı ishinde 124,2 myń adam kelgen, ótken jyldyń osy kezeńinde óńirde 69,5 myń adam bolǵan.
«Imantaý-Shalqar kýrorttyq aımaǵy respýblıkalyq mańyzy bar TOP-10-ǵa kirdi. Bul aımaqta týrısterdiń jaqsy demalýyna jaǵdaı jasalyp jatyr. Sońǵy úsh jylda 250 km jol jóndeldi. Ekologııa, geologııa jáne tabıǵı resýrstar mınıstrligimen birge kýrorttyq aımaqta, ulttyq park aýmaǵynda 17,5 km joldy salý, elektr jelilerin tartý jáne abattandyrýǵa jobalyq-smetalyq qujattary ázirlenip jatyr», - deıdi Danııar Isaev.
Aıyrtaý aýdanyndaǵy Imantaý-Shalqar kýrorttyq aımaǵynda qazir 40 demalys bazasy, onyń jeteýi jyl boıy jumys isteıdi. Bıyl 45 orynǵa shaqtalǵan «Imantaý demalys bazasy jáne 24 oryndyq «Ekkert S.A.» qonaq úıleri ashyldy.
«Budan basqa 200-ge jýyq oryndyq 8 joba júzege asyp jatyr. «Shalqar Sý» sanatorııinde 1 mlrd teńgege kúrdeli jóndeý bastaldy. Demalys orny 120 orynǵa arnalǵan. Keler jyldary 5 úlken jobany júzege asyrmaqpyz, olar: kópsalaly týrıstik keshenniń, glempıngterdiń, «Balalar» sporttyq-ǵylymı balalar lageriniń jáne eko-oteldiń qurylysy», - deıdi basqarma basshysynyń orynbasary.
Mamannyń aıtýynsha, keler jyldan bastap týrıstik nysandardy salyp, jańǵyrtqandarǵa shyǵyndarynyń 10 %-y, avtokólikterdi satyp alǵandarǵa 25 %-y, jol boıynda servıs nysandaryn salýshylardyń jumsaǵan qarjysynyń 10 %-y jáne sanıtarlyq-gıgıenalyq toraptardy ustaýǵa bekitilgen tólem – 83,3 myń teńge qaıtarylmaq.