SQO-ǵa bıyl qar jyldaǵy normadan 3 ese kóp jaýǵan

<p>PETROPAVL. KAZINFORM &ndash; Soltústik Qazaqstan oblysynda bıyl qar qalyń jaýǵan. Kúzdegi jańbyr da áser etip, jer 1,2 metrge deıin toń bolyp qatyp qalǵan. Saldarynan bıyl kóktemde óńirde sý tasqyny bolý yqtımaldyǵy joǵary.&nbsp;</p>

«Qazgıdromet» RMK SQO boıynsha fılıal dırektory Qymbat Merǵalımovanyń aıtýynsha, óńirde 19 gıdrologııalyq beket bar. Aımaqta kóktemde sý tasqynynyń bolý-bolmaý jaǵdaıyn boljaý úshin qys aldyndaǵy topyraqtyń, qys sońyndaǵy qardyń ylǵal mólsheri, jerdiń qatý tereńdigi, kóktemniń erte-kesh shyǵýy, sý qoımalarynyń tolýy esepke alynady. Kórshi Aqmola oblysyndaǵy jaǵdaı da eskeriledi. Máselen, Sergeev sý qoımasy qazirgi ýaqytta 88%-ǵa jetken, bul ótken jyldyń osy kezeńimen salystyrǵanda 10%-ǵa artyq.

«Kúz jyly jáne jaýyndy-shashyndy boldy. Alqaptardy baǵyttyq zertteý barysynda 1 metrlik topyraqtaǵy ylǵal qory 52-164 mm qurady, bul normadan 76% joǵary. Bıylǵy 10 qańtardaǵy jaǵdaı boıynsha oblysta qys mezgilinde 52-155 mm mólsherinde qar jaýǵan. Jalpy óńirdiń basym aýmaǵynda jaýǵan qar qalyńdyǵy kóp jylǵy belgiden 1,5-2, keı jerlerde 3 esege deıin joǵary. SQO-da norma – 29-58 mm. Onyń ishinde Ǵ.Músirepov atyndaǵy aýdanda 154,6 mm qar jaýsa, Aqqaıyń aýdanynda eń tómengi kórsetkish - 52 mm bolǵan. Sondaı-aq toń bolyp qatqan jer qalyńdyǵy bıyl 123 sm-ge jetip otyr», - deıdi Qymbat Merǵalımova.

Mamannyń aıtýynsha, bıyl qardaǵy ylǵal mólsheri de jyldaǵy normadan 33-83%-ǵa artyq. 

«Aqpan aıynda aýa raıy qańtardaǵydaı saqtalady, ıaǵnı, qar jaýady, boran da saqtalady. Ortasha aýa temperatýrasy 13,0…-14,5 S shamasynda bolmaq, bul normadan 1…2S joǵary. Naýryzda aýa temperatýrasy jyldaǵydan 2°S joǵary jáne jaýyndy-shashyndy bolmaq. Aıdyń sońǵy bes kúndiginde qart kúrt erı bastaıdy», - deıdi Qymbat Merǵalımova. 

Sınoptıkter sý tasqynyna qatysty negizgi boljamdy 5 naýryzda beredi.