SQO-ǵa arzan dızel otyny klımattyq jaǵdaı eskerilmeı berilgen

PETROPAVL. QazAqparat – Soltústik Qazaqstan oblysyna jeńildetilgen baǵamen janar-jaǵar maı bólingende óńirdiń aýa raıy esepke alynbaǵan. Saldarynan eginshilikpen aınalysatyn 3,5 myń dıqan kóktemde birqatar qıyndyqqa ushyrap kelgen. Endi bul másele sheshimin tapty, dep habarlaıdy QazAqparat tilshisi.

SQO sybaılas jemqorlyqqa qarsy qyzmettiń málimetinshe, óńir dıqandaryna arzandatylǵan dızel otyny klımattyq jaǵdaılar esepke alynbaı bólingen. Bul máseleni janar-jaǵarmaı materıaldarynyń operatorlary kóterdi.

«QR Energetıka mınıstrligi óńir fermerleriniń maýsymdyq dala jumystaryna qajet dızel otynynyń kóp bóligin tehnıkalyq sıpattamalary eldiń soltústik óńirleriniń aýa-raıyna sáıkes kelmeıtin Atyraý munaı óńdeý zaýytynan bólip kelgen. Osynyń saldarynan janar-jaǵarmaı qatyp qalyp, kóktemgi dala jumystarynyń kesheýildeýine, qymbat sheteldik aýyl sharýashylyǵy tehnıkasynyń isten shyǵýyna ákep soqtyrdy. Jyl saıyn oblystyń 3,5 myńǵa jýyq sharýasy osyndaı problemaǵa urynyp kelgen», - delingen vedomstvo taratqan habarlamada.

Endi bul másele sheshimin taýyp otyr. QR Sybaılas jemqorlyqqa qarsy is-qımyl agenttigi Aýyl sharýashylyǵy mınıstrliginiń alańynda vedomstvoaralyq jumys keńesin uıymdastyrdy, onda joǵaryda atalǵan másele QR Energetıka mınıstrligi basshylyǵyna jetkizildi.

Nátıjesinde, beıindi mınıstrlik osy jylǵy kóktemgi dala jumystaryna soltústik óńir úshin neǵurlym beıimdelgen Pavlodar munaı-hımııa zaýytynan 53 myń tonna dızel otynyn bólý týraly sheshim qabyldady. Qalǵan qajet mólsher - 20,6 myń tonna, kún jylynysymen mamyr aıynda Atyraý munaı óńdeý zaýytynan jetkiziletin bolady.

Buǵan deıin SQO-ǵa kóktemgi dala jumystaryna 74 myń tonnaǵa jýyq janar-jaǵarmaı qajettigin, bıyl onyń aqpan aıynan bastap jetkizile bastaıtynyn aıtqan edik.

SQO sybaılas jemqorlyqqa qarsy qyzmet arzan dızel otynyn alý úshin jumysyn toqtatqan agroqurylymdardy da esepke alý derekterin anyqtady.