SQO-ǵa 4 jyl ishinde «Eńbek» baǵdarlamasy arqyly 2700 otbasy qonys aýdardy
SQO jumyspen qamtýdy úılestirý jáne áleýmettik baǵdarlamalar basqarmasynyń málimetinshe, «Eńbek» memlekettik baǵdarlamasy aıasynda 2017-2021 jyldar aralyǵynda oblysqa 2700 otbasy, ıaǵnı 9 120 adam qonys aýdardy. Olardyń ishinde 3874 adam eńbekke qabiletti jasta bolsa, sonyń 3100-i eńbekpen qamtyldy. Al 550 adam bala kútimine baılanysty demalysta bolsa, 220-sy zeınetker. Budan basqa 4300-ge jýyq bala, 276 stýdent keldi. Qonys aýdarýshylardyń qajetine osy aralyqta 1,9 mlrd teńge qarajat jumsaldy.
«Memlekettik baǵdarlama aıasynda jumys kúshi mol óńirlerden erikti túrde qonys aýdarýshylarǵa kóshýge materıaldyq kómek kórsetilip, turǵyn úıdi jaldaý jáne kommýnaldyq aqyny tóleý shyǵyndardy óteldi. Qysqa merzimdi kýrstardan ótip, kásipkerlikpen aınalysýǵa múmkindik berildi. 20 jylǵa jaldamaly turǵyn úı usynyldy. Aı saıynǵy tólem shamamen 10 myń teńgeni quraıdy. 5 jyldan keıin turǵyn úıdi qalǵan quny boıynsha satyp alýǵa bolady. Baǵdarlama 2021 jyly aıaqtaldy. Bıyl «Qýatty óńirler» ulttyq jobasy aıasynda kóshi-qon baǵdarlamasy jalǵasyn tappaq», - deıdi basqarmanyń bas mamany Nazerke Tasqulova.
Kóshýge materıaldyq kómek otbasynyń ár múshesine 70 AEK mólsherinde bir ret, turǵyn úıdi jaldaýǵa jáne kommýnaldyq qyzmetterdi tóleýge materıaldyq kómek aı saıyn, otbasy quramy men qonystandyrý ornyna baılanysty on eki aı boıy 15-30 AEK mólsherinde qarajat tólenedi.
«600-deı adam kelgen jaqtaryna qaıtty. Otbasylyq jaǵdaıǵa, aýa raıy jaqpaı densaýlyqqa baılanysty kóship ketkender boldy. Baspananyń jaısyzdyǵyna baılanysty ketkender de bar, ol jaıynda áleýmettik jelide aıtyldy. 2020 jylǵa deıin kelýshilerge kóship kelgen aımaqta bir jyl turý mindeti qoıyldy. Sondyqtan olar áleýmettik talapty oryndaǵandyqtan, memleketke eshteńe qaıtarmaıdy. Al talapty oryndamaǵandar erikterimen nemese sot arqyly ózderine jumsalǵan qarajatty qaıtarady», - deıdi Nazerke Tasqulova.
Jalpy basqarma saıtynyń (www.ukzsp.sko.gov.kz) «Etnıkalyq jáne eńbek kóshi-qony» taraýynda qajetti aqparatty alýǵa bolady.
Sondaı-aq, jumys kúshi artyq óńirlerden qonys aýdarý máselesine qatysty aqparat «Enbek.kz» elektrondyq eńbek bırjasy portalynda «Azamattarǵa arnalǵan qyzmetter» qosymshasynda «Qonys aýdarý» bóliminde ornalastyrylǵan.