SQO fermalarynyń birinde Ózbekstannyń 14 azamaty zańsyz jumys istep kelgen
SQO polıtsııa departamenti baspasóz qyzmetiniń málimetinshe, óńirde 10-17 naýryz aralyǵynda «Mıgrant» jedel-profılaktıkalyq is-sharasy ótedi. Oblystyń tártip saqshylary túsindirý jumystaryn kúsheıtip, eńbek kóshi-qon máselelerin nazarǵa aldy. Óńirge negizinen jumys isteýge Ortalyq Azııa elderiniń azamattary keledi. Alaıda olardyń bizdiń elde jumysqa ornalasýynyń óz tártibi bar. Máselen Ózbekstan, Tájikstan jáne Ázerbaıjan azamattaryna tek jeke tulǵalarda eńbek etýge bolady, bir jumys berýshide sheteldik sany 5-den aspaýy tıis. Biraq keı jumys berýshiler zańnamanyń atalǵan normasyn elemeıdi.
Tekseris barysynda Aqjar aýdanyndaǵy fermerlik sharýashylyqtardyń birinde tıisti ruqsatsyz Ózbekstannyń 14 azamatynyń jumys istep jatqany anyqtaldy. QR aýmaǵynda bolý erejelerin buzǵany úshin olarǵa qatysty ákimshilik materıal jınaldy. Sheteldik eńbek kúshin zańsyz paıdalanǵany úshin fermer ákimshilik jaýapqa tartyldy.
«Oblys aýmaǵynda «Mıgrant» operatsııasy aıasynda tekserister sharýashylyqtarda, qurylys alańdarynda, bazarlarda jáne ózge memleket azamattary jumysqa jıi ornalasady degen oryndarda júrgizilip jatyr. Kóshi-qon legine baqylaý jasaý – quqyqtyq tátipti nyǵaıtý boıynsha jumystyń mańyzdy vektory», - deıdi SQO PD Kóshi-qon qyzmeti basqarmasynyń bastyǵy Talǵat Ábilov.
Jedel-profılaktıkalyq is-sharanyń alty kúni ishinde sheteldik eńbek kúshin zańsyz tartqany úshin 18 qazaqstandyq jaýapqa tartyldy. QR aýmaǵynda bolý tártibiniń túrli zań buzýshylyqtary úshin 201 sheteldik jaýapqa tartyldy. Mysaly, Túrkııanyń 8 turǵyny elde bolý merzimniń ótip ketýine qaramastan, QR tys jerge shyǵýǵa asyqpaǵan. Sot sheshimi boıynsha QR kóshi-qon zańnamasyn birneshe ret buzǵany úshin 20 sheteldik elimizden shyǵaryldy.