SQO energetıka jáne TKSh basqarmasynyń basshysy 8 jylǵa sottaldy

<p>Petropavl qalalyq soty asa iri kólemde birneshe ret bıýdjet qarajatyn urlaý jáne para alý-berý boıynsha qylmystyq iske qatysty sot úkimin shyǵardy. Soltústik Qazaqstan oblysy energetıka jáne turǵyn úı-kommýnaldyq sharýashylyq basqarmasynyń basshysy 8 jylǵa, onyń eki sybaılasy 7,5 jylǵa jáne bireýi 7 jylǵa bas bostandyǵynan aıyryldy, dep habarlaıdy <a href="https://kaz.inform.kz/" target="_blank" rel="noopener">QazAqparat</a> tilshisi.</p>

Sottalǵandar - SQO energetıka jáne turǵyn úı-kommýnaldyq sharýashylyq basqarmasynyń basshysy Baqyt Іlııasov, «Kommýnhoz» memlekettik kommýnaldyq kásipornynyń dırektory Jandarbek Aıtbaev, «Damý 2013» JShS dırektory Serik Shaıymov jáne «Astana Jol qyzmet» JShS dırektorynyń orynbasary Rústem Mahmutuly. Shaıymov pen Mahmutuly – aǵaıyndylar.

Qylmysty Baqyt Іlııasov Petropavl qalalyq ákimdiginde turǵyn úı-kommýnaldyq sharýashylyq bólimin basqarǵanda jasaǵan. Sheneýnik memlekettik satyp alý týraly zańdy buzyp, joldardy kútip ustaýǵa jáne aǵymdaǵy jóndeý jumysyn júrgizýge «Kommýnhoz» kásipornymen kelisim-shart jasasqan. Іs júzinde seriktestik bul jumystardy ózi atqarmaı, ony basqa merdigerge júktegen.

Jumystyń smetalyq quny asyra kórsetilgen, is tolyq atqarylmaǵan, Іlııasov buǵan kóz juma qaraǵany úshin para alyp otyrǵan.

Máselen 2021 jyldyń mamyr-tamyz aılarynda «Kommýnhoz» kásipornynan «Damý 2013» JShS-ge 91 mln teńge aýdarylǵan. Bul joly 36 mln teńgege jýyq bıýdjettik qarajat qoldy bolǵan.

Memlekettik aıyptaýshynyń aıtýynsha, qalalyq ákimdiktiń bólim basshysy sondaı-aq kóshelerge qıyrshyq tas tóseý úshin «Kommýnhoz» kásipornyna 350 mln teńge aýdarǵan. Keıin Іlııasov istelgen jumystyń sapasyna, paıdalanylǵan materıalǵa jáne jumystyń tolyq atqarylmaýyna kóz jumyp, birneshe aktige qol qoıǵan.

Іlııasov parany aqshamen ǵana emes, kvadrotsıkl, qymbat oteldegi demalys retinde de alǵan. Sondaı-aq sheneýnik óziniń 2013 jylǵy «Lexus LX570» kóligin eshqandaı qosymsha tólemsiz Mahmutulynyń 2019 jylǵy «Toyota Land Cruiser 200» kóligine aıyrbastaǵan.

SQO soty baspasóz qyzmetiniń málimetinshe, sottalýshylar kinásin moıyndamady.

Petropavl qalalyq soty Baqyt Іlııasovty 8 jylǵa bas bostandyǵynan aıyryp, zańsyz ıe bolǵan múlikti – kvadrotsıkldi jáne kólikterdi aıyrbastaý kezindegi aıyrmashylyq 13 mln teńgege jýyq qarajatty, qymbat qonaq úıge tólengen 155 myń teńgeni memleket menshigine qaıtarýdy mindettedi.

Shaıymov pen Mahmutuly 7,5 jylǵa, al Aıtbaev 7 jylǵa sottaldy.

Sottalǵandar memlekettik qyzmette eńbek etý quqyǵynan ómir boıyna aıyryldy.