SQO dúkenderindegi azyq-túliktiń 65 paıyzy - otandyq ónim
SQO ákimi baspasóz qyzmetiniń málimetinshe, óńir basshysy Qumar Aqsaqalov Aqjar aýdanyna sapary barysynda 5 aıdyń qorytyndysyn shyǵardy. Onyń nátıjesi boıynsha, ekonomıkalyq ósim jaman emes. Aýyl sharýashylyǵynyń jalpy ónim kólemi 2,5% artty.
«Mal sharýashylyǵynda ósim joǵary. Buǵan 7 sút fermasynyń tolyq qýatynda jumys isteýge kóshýi áser etti. Oblysta 68,4 myń tonna sút óndirilse, onyń 8,5 myń tonnasy osy fermalarǵa tıesili. Bıyl taǵy 10 zamanaýı sút kesheniniń qurylysy bastaldy», - deıdi Qumar Aqsaqalov.
Aqjar aýdanynda, ázirshe, mundaı bir ǵana sút fermasy bar. Kásipkerler sút óndirisin damytýǵa asyǵar emes.
«Oblysta et jáne sút óndirisin damytýǵa jaǵdaı bar. Tabıǵaty mal ósirýge qolaıly, muny tıimdi paıdalanýymyz kerek. Ózimizde shyǵarylatyn ónim arzanǵa túsedi jáne sapaly bolady», - deıdi óńir basshysy.
Qazirgi tańda iri saýda oryndarynyń sórelerindegi azyq-túliktiń 65% ǵana jergilikti jáne otandyq ónimder. Qalǵany syrttan jetkiziledi. Sońǵy birer jylda Soltústik Qazaqstanda shyǵarylatyn sút ónimderiniń túri 98-den 150-ge deıin artty. Jergilikti kásipkerler et ónimderiniń 90 túrin tutynýshylarǵa usynyp otyr.
Qazir dúkenderdegi nan, jumyrtqa, kartop, qyzylsha men qııar ǵana 100% jergilikti ónim. Sondaı-aq óndirýshiler oblysty sary maımen 71%-ke, unmen 56%-ke qamtyp otyr. Pasterlengen súttiń 50%, shujyq ónimderiniń 39%, aırannyń 38%, jarmalardyń 12% jergilikti ónim alady.