SQO dárigerleri bıyl terezeden qulap ketken 6 balany aman alyp qaldy
Balalardyń terezeden qulaý faktileri kóbeımese azaıar emes. Soltústik Qazaqstan oblystyq kópbeıindi balalar aýrýhanasynyń travmatologııa jáne ortopedııa bóliminiń meńgerýshisi Asylhan Jaǵyparovtyń aıtýynsha, bıyl jarty jylda ótken jyldyń uqsas kezeńimen salystyrǵanda balalardyń bıikten qulaý jaǵdaılary 16,6% artqan. Sondyqtan dárigerler amalsyzdan bul máselege eresekterdiń nazaryn aýdarýdy jón sanapty.
«Bul balalar qandaı jaǵdaıda qulaıdy? Qazir úılerde negizinen plastıkalyq terezeler tur. Shybyn-shirkeıge qarsy moskıttik tor qurylady. Mine osy tordy bala qolmen ıterip qalyp bıiktikten tómen qulap jatyr. Kópshilik «meniń balam terezege barmaıdy, aqyly bar, qulamaıdy» dep oılaıdy. «Birinshi-ekinshi qabatta turamyz, qulaýy múmkin emes» dep balany nazardan tys jiberip alady. Qandaı da bir bes sekýndtyń ishinde bala bıikten qulap, mert bolý qaýpi joǵary», - deıdi Asylhan Jaǵyparov.
Bıyl kópqabatty úıdiń terezesinen qulaǵan alty balanyń ekeýi – 5 jasqa deıingi búldirshin. Qalǵan tórteýi – 10 men 18 jas aralyǵyndaǵy jasóspirimder.
«Eresekteý balalar psıhıkalyq jaǵdaıyna baılanysty nemese oınap júrip, abaısyzda qulap ketedi. Mundaı jaǵdaıǵa jol bermes úshin ata-analar balalaryna muqııat bolsa eken deımiz. Qazir terezelerge arnalǵan qorǵanysh zattardyń túrleri kóp. Sondaı-aq tereze janyna jıhaz, oryndyq qoıýǵa bolmaıdy. Balaǵa tereze jaqtaýyna minýdiń qaýipti ekendigin aıtyp, túsindirý kerek», - deıdi Asylhan Jaǵyparov.
Dárigerdiń aıtýynsha, aýrýhanaǵa túsken balalarda bas mıy jaraqaty, bas mıynyń shaıqalýy, omyrtqanyń synýy, ókpeniń jyrtylýy, qannyń uıýy, qol-aıaǵynyń synýy sekildi jaraqattar bolǵan. Mamandar aýyr halde túsken balalardyń ómiri úshin kúresip, byltyr da, bıyl da ólimge jol bergen joq.
Buǵan deıin Petropavlda 100 myń AQSh dollaryn alǵan kásiporyn basshysynyń 11 jylǵa sottalǵanyn jazǵan edik.