SQO-daǵy túrme basshysy kisi óliminen keıin qyzmetinen ketti
SQO prokýratýrasynyń málimetinshe, QR ІІM qylmystyq-atqarý júıesi komıtetiniń Aıyrtaý aýdanyndaǵy mekemesinde anyqtalǵan birneshe olqylyqqa qatysty osy mekemeniń eki bastyǵy qyzmetinen bosatyldy. Taǵy bes qyzmetker qatań tártiptik jaýapkershilikke tartyldy.
Oblys prokýratýrasynyń osy mekemeniń qyzmetinde birqatar eleýli buzýshylyqtardy anyqtaǵan usynysy SQO prokýrorynyń orynbasary Murat Qojamqulovtyń qatysýymen QR ІІM QAJK alańynda qaraldy.
Tekseristi júrgizýge byltyr kúzde Novoýkraınka eldi mekenindegi túzeý mekemesinde bir sottalǵannyń ekinshisin balǵamen uryp óltirýi sebep bolǵan. Onyń qasaqana óltirgeni beınekameraǵa túsip qalyp, keıin beınejazba áleýmettik jelige tarap ketti.
Oblys prokýrory orynbasarynyń aıtýynsha, tek osy bir fakti ǵana mekemedegi tártip úshin jaýap beretin laýazymdy tulǵalardyń óz qyzmetine jaýapsyzdyqpen qaraǵanyn kórsetip otyr. Baqylaýdyń tolyqtaı joqtyǵy, mundaǵy jazasyn óteýshige rejımdegi, qorǵalatyn obektide asa aýyr qylmys jasaýǵa jaǵdaı jasaǵan.
Qadaǵalaý organy aldaǵy ýaqytta uqsas jaǵdaılarǵa jol bermeý úshin barlyq tıisti sharalardy qabyldaýdy jáne vedomstvolyq baqylaýdy kúsheıtýdi talap etti.
Esterińizge salaıyq, Aıyrtaý aýdany Novoýkraınka eldi mekenindegi qylmystyq-atqarý júıesiniń №51 mekemesinde 1994 jáne 1976 jyly týǵan sottalǵandar arasynda janjal shyqqan. Tóbelestiń saldarynan 1976 jyly týǵan jazasyn óteýshi Aıyrtaý aýdanynyń aýrýhanasynda alǵan jaraqatynan esin jımastan qaıtys boldy.