SQO-daǵy Tereńkólde balyqtyń qyrylý sebebi anyqtaldy
Esterińizge salaıyq, sáýir aıynyń sońynda SQO Aqqaıyń aýdany Tereńkólde balyqtyń qyrylý faktisi tirkeldi. Oqıǵa ornyna ekologter, Esil oblysaralyq basseındik balyq sharýashylyǵy ınspektsııasy, SQO tabıǵı resýrstar jáne tabıǵat paıdalanýdy retteý basqarmasy, Aqqaıyń aýdanynyń veterınarııa qyzmeti mamandary jáne «NPTs RH» JShS qyzmetkerleri attanyp, balyqtyń qyrylý sebebin anyqtaý úshin ólgen balyqtyń ushasy men sý synamasy alyndy.
100 kg shamasynda ólgen sý jándigi jıyp alynyp, joıyldy. Mamandar balyqtyń qyrylý sebebin anyqtady. Oblystyq ekologııa departamentiniń málimetinshe, Tereńkóldegi balyqtardyń qyrylýyna sý qoımasyndaǵy taıaz ýchaskelerdiń qatyp qalýy sebep.
«Tereńkól kólinde balyqtyń ishinara qyrylýy sý qoımasynyń taıaz ýchaskeleriniń túbine deıin qatýy saldarynan boldy. Qysta qatty aıazdan óńirdegi sý aıdyndarynda muzdyń qatýy 1-1,5 metrge jetti. Kóldi jalǵa alýshyǵa sý aıdynynyń gıdrohımııalyq rejımin jaqsartý úshin sý aıdynyna turaqty monıtorıng júrgizý, artyq ósimdikterdi shabý jáne aeratsııa júrgizý boıynsha melıoratıvtik jumystar júrgizý usynyldy. Al sý qoımasyn jalǵa alýshy janýarlar dúnıesin qorǵaý, balyq ósimin molaıtý jáne paıdalaný týraly zańnamany buzǵany úshin tabıǵatqa keltirilgen zalaldy óteıdi», - deıdi ekologııa departamentiniń mamandary.