SQO-daǵy saılaý ýchaskelerinde 348 baıqaýshy jumys istep jatyr

PETROPAVL. QazAqparat – Soltústik Qazaqstan oblysynda aýyl ákimderi saılaýynyń ádil ótýin 348 baıqaýshy baqylaýǵa alǵan. Budan basqa 174 mobıldi kapıtan saılaý ýchaskelerinde jumys istep jatyr, dep habarlaıdy QazAqparat tilshisi.

«Partııalyq emes baıqaý ortalyǵy» RQB SQOF tóraǵasy Janat Muhamedjanovtyń pikirinshe, elimizde alǵash ret ótip otyrǵan aýyl ákimderiniń saılaýy - eldi demokratııalandyrýdaǵy jáne jergilikti basqarý ınstıtýttaryn nyǵaıtýdaǵy mańyzdy qadam.

«SQO-da barlyǵy 13 aýdan, aýdandyq mańyzy bar tórt qala jáne 190 aýyldyq okrýg bar. Oblysta aýyl halqynyń sany 288 myńnan asady. Bul barlyq oblys turǵynynyń 53 %-y. Alaıda osy joly saılaý tórt jyldyq ókilettik merzimi aıaqtalǵan jáne óz qyzmetin merziminen buryn bitirgen aýyl okrýgteri ákimderiniń arasynda ótip jatyr. Soltústikqazaqstandyqtar 70 aýyldyq okrýg jáne Mamlıýtka qalasynyń ákimin tańdaıdy. Bul rette 61 ákim tolyq merziminiń aıaqtalýyna baılanysty, 10 ákim merziminen buryn qyzmetten ketýine baılanysty saılanady», - deıdi Janat Muhamedjanov.

Qazir 174 saılaý ýchaskesinde daýys berýdi 348 baıqaýshy jáne 174 mobıldi kapıtan baqylaýǵa alǵan.

«Saılaý barysyn qoǵamdyq baqylaýǵa alý azamattyq boryshymyz. Bizdiń ustanym - jarııalylyq, ashyqtyq, ádildik, parasattylyq jáne zańdylyq qaǵıdattary.

Qoǵamdyq qozǵalys retinde qurylǵan oblystaǵy ortalyqqa táýelsiz baqylaýshylar enip, saılaý barysy zańdy jáne legıtımdi ótedi degen úmittemiz», - deıdi Janat Muhamedjanov.