SQO-daǵy Pıtnoe kólinde balyq qyryldy

PETROPAVL. QazAqparat – Soltústik Qazaqstan oblysyndaǵy Pıtnoe kólinde bıyl da balyq qyryldy. Tıisti vedomstvolardyń mamandary oqıǵa ornyna baryp, sý jándikteriniń neden ólgenin anyqtaý úshin synama aldy, dep habarlaıdy QazAqparat tilshisi.

SQO Ekologııa departamenti baspasóz qyzmetiniń málimetinshe, 1 tamyz kúni balyqtyń qyrylǵandyǵy týraly aqparat túsisimen Ekologııa departamentiniń mamandary, Esil oblysaralyq basseındik balyq sharýashylyǵy ınspektsııasy, SQO ákimdiginiń tabıǵı resýrstar jáne tabıǵat paıdalanýdy retteý basqarmasy qyzmetkerleri jumys tobyn quryp, Jambyl aýdanynda ornalasqan Pıtnoe kóline bardy.

Mamandar kóldiń jaǵalaýyn tekserdi, aldyn ala esep boıynsha, shamamen 100 kg astam móńke, alabuǵa balyǵy qyrylǵan. Sý jándikteriniń neden ólgenin anyqtaý úshin kól sýynyń synamasy, sondaı-aq ólgen balyqtyń ushasy laboratorııalyq saraptamalar júrgizý úshin alyndy.

Qyrylǵan balyqty Kladbınka aýyldyq okrýginiń ákimdigi jınap, joıdy.

Ekologtardyń aıtýynsha, tekserý qorytyndysy jáne kyrylǵan balyqtyń sebebi anyqtalǵannan keıin qosymsha habarlanatyn bolady.

Jambyl aýdany Pıtnoe kólinde balyq alǵash ret qyrylǵan joq. Esterińizge salaıyq, osydan úsh jyl buryn sý aıdynynda jarty tonnaǵa jýyq móńkeniń óleksesi tabylǵanyn aıtqan edik. Mamandar ol joly da tekserý júrgizip, nátıjesinde balyqtyń kól túbinen kúkirtsýtektiń kóp mólsherde bólinýinen ólgenin anyqtady.