SQO-daǵy mektepterdi jóndeýge bıyl 3 mlrd teńge jumsalady

PETROPAVL. QazAqparat – Soltústik Qazaqstan oblysyndaǵy bilim berý mekemelerin jónge keltirýge byltyr 5,4 mlrd teńge jumsalyp, júzdegen mektep jóndeldi. Bıyl bul jumystar jalǵasyn tabady, dep habarlaıdy QazAqparat tilshisi.

SQO Bilim basqarmasy jetekshisiniń orynbasary Vladımır Tkachenkonyń málimetine súıensek, bıyl 3 mlrd teńgege oblystaǵy 60 nysan jóndeledi. Onyń 46-sy 8 myńnan astam oqýshysy bar aýyl mektebi.

Óńirde mektepterdi kúrdeli jóndeýden ótkizý jumystary byltyr bastaldy. Osy maqsatqa bıýdjetten 5,4 mlrd teńge bólindi. Nátıjesinde oblystaǵy 130 nysan, sonyń ishinde 100 aýyl mektebi jańartyldy.

«Bilim berý mekemelerin jónge keltirý oqýshylardyń oqý jaǵdaıyn jaqsartyp, bul óz kezeginde olardyń bilim alý sapasyna áser etedi. Taǵy bir basty kórsetkish – balalardyń qaýipsizdigi. Oblysta 604 bilim berý nysany bolsa, sonyń teń jartysynda ǵana beınekameralar bar», - deıdi Vladımır Tkachenko.

Bıyl qalǵan 294 nysandy beınebaqylaý júıesimen qamtý úshin oblystyq bıýdjetten 258,9 mln teńge bólinbek.

Budan basqa mektepterdi jyly dárethanalarmen qamtamasyz etý máselesi tur. Óńirde 475 mektep bolsa, sonyń 422-sinde, ıaǵnı 89% ǵana talapqa saı jyly dárethana bar eken. Bul másele bıyl tolyǵymen sheshimin tappaq.