SQO-daǵy kolonııalardyń birinde suıyq maı óndirisi qolǵa alyndy

PETROPAVL. QazAqparat – Soltústik Qazaqstan oblysyndaǵy Qylmystyq atqarý júıesi departamentine qarasty ES-164/3 mekemesinde ósimdik maıyn óndiretin tseh ashyldy, dep habarlaıdy QazAqparat tilshisi.

SQO QAJD baspasóz qyzmetiniń málimetinshe, jazasyn óteýshilerdi jumysqa tartyp, jańa óndiris oryndaryn uıymdastyrý úshin sottalǵandardyń eńbegin uıymdastyrý bólimshesiniń qyzmetkerleri kásipkerlik sýbektilerin tartý boıynsha jumys atqarady. Nátıjesinde ES-164/3 mekemesiniń aýmaǵynda aqpan aıynda «SK ADS» JShS quryldy. Shaǵyn kásiporyn kúnbaǵys maıyn shyǵarýdy qolǵa aldy.

Ósimdik maıyn shyǵaratyn tsehqa qajetti stanoktardy ornatýǵa qalyp jasaý úshin úsh sottalǵan jumyldyryldy. Bul jumys atqarylǵannan keıin kásipker kúnbaǵysty óńdeıtin úsh stanok jetkizdi. Onyń bireýi daqyldy keptiredi, ekinshisi qabyǵyn arshıdy, al úshinshisi daqyldy syǵyp, maı shyǵaratyn stanok.

«Kóp jumys atqaryldy. Elektr qýatyn tartý qajet boldy, stanoktar ornatyldy. Shıkizat jetkizilip, qondyrǵyny jónge keltirý barysynda alǵashqy suıyq maı alyndy. Bul maı mal sharýashylyǵynda qoldanylady. Óıtkeni tazartylmaǵan maı. Al jomy qala men oblystyń qus fermalaryna satylady. Sondaı-aq ony Petropavldaǵy balyq aýlaý dúkenderine jetkizý máselesi sheshilip jatyr», - deıdi SQO boıynsha QAJD ES-164/3 mekemesiniń sottalǵandardyń eńbegin uıymdastyrý bólimshesiniń bastyǵy Sergeı Saýlov.

Tseh tolyq iske qosylǵan ýaqytta jumysshylar sany úsheýden onǵa deıin artpaq.