SQO-daǵy Imantaý-Shalqar kýrorttyq aımaǵyna barǵan týrıster 80%-ǵa ósken

PETROPAVL. QazAqparat – Soltústik Qazaqstan oblysyndaǵy Imantaý-Shalqar kýrorttyq aımaǵynda bıyl 324 oryndyq 15 demalys ornyn paıdalanýǵa berý josparlanǵan. Endi týrızm salasyn damytýǵa jumsalǵan qarajattyń bir bóligi kásipkerlerge sýbsıdııalanady, dep habarlaıdy QazAqparat tilshisi.

CQO ákiminiń orynbasary Dáýren Jandarbektiń aıtýynsha, óńirdiń týrızm salasynda aıtarlyqtaı oń ózgerister bar. Máselen, ótken jyldyń 9 aıynda 1 mlrd teńgeniń qyzmeti kórsetilgen, bul 2020 jyldyń osy kezeńimen salystyrǵanda eki ese artyq. Kelgen týrıster sany da 79,2 %-ǵa kóp. 2020 jyly 70 myńǵa jýyq adam qydyryp kelse, byltyr olardyń sany 125 myńǵa jýyqtaǵan.

«Imantaý-Shalqar kýrorttyq aımaǵy elimizde damytylýy tıis TOP-10-dyqqa kirgen. Memlekettik baǵdarlama 2019 jyly qabyldandy. Jyldan-jylǵa bul aımaqqa kelip, demalýshylar sany artyp keledi. 2020 jyldyń 9 aıynda 18 myń, byltyr osy aralyqta 25 myńǵa jýyq adam kelgen», - deıdi Dáýren Jandarbek.

Qazirgi ýaqytta kýrorttyq aımaqta 40 demalys orny bar. Onyń onynda byltyr jańa nysandar salyndy. 1 mlrd teńge ınvestıtsııa quıyldy. Bıyl 324 oryndyq 15 nysandy paıdalanýǵa berý josparlanǵan. Qazir aımaqty jyl boıy jumys isteıtin 6 demalys orny bar, jaqynda olardyń sany 10-ǵa jetpek.

«Bıyldan bastap týrızmdi memlekettik qoldaýdyń jańa tetikteri engizildi. Endi ulttyq standartqa sáıkes keletin týrıstik qyzmet kórsetý nysandaryn, jol boıyndaǵy servıs obektilerin salý nemese jónge keltirý kezinde qurylys-montajdaý jumystaryna ketken shyǵyndardyń 10 %-y óteledi. Keminde 8 oryndyq týrıstik avtobýstardy satyp alǵan jaǵdaıda onyń qunynyń 25 %-y sýbsıdııalanady. Budan basqa sanıtarııalyq-gıgıenalyq toraptardy kútip ustaý úshin aı saıyn 83 300 teńge mólsherinde demeýqarjy beriledi», - deıdi SQO ákiminiń orynbasary Dáýren Jandarbek.