SQO-daǵy eń úlken jylyjaı qurylysy aıaqtalýǵa jaqyn

PETROPAVL. QazAqparat – Soltústik Qazaqstan oblysynda jylyna 3 myń tonna kókónis beretin jylyjaı qurylysy júrip jatyr. Zamanaýı tehnologııamen jabdyqtalǵan nysan jazdyń sońynda paıdalanýǵa berilip, 65 adamdy jumyspen qamtymaq, dep habarlaıdy QazAqparat tilshisi.

SQO Aýyl sharýashylyǵy jáne jer qatynastary basqarmasy baspasóz qyzmetiniń málimetinshe, nysan qurylysy Petropavlda júrip jatyr. 3,7 ga aýmaqta jylyna 1300 tonadan astam qııar, 1500 tonna shamasynda qyzanaq jáne 170 tonna salat ósirilmek. Nysandy iske qosýǵa 7,2 mlrd teńge jumsalady.

«Zamanaýı jylyjaı klımatty basqarýdyń avtomatty júıesimen jabdyqtalady, tamshylatyp sýarý ádisi qoldanylady. Qysta da kókónisterdi ósirý úshin qosymsha jaryqtandyrylyp, jylytylady. Gollandııalyq gıdroponıkalyq júıe jyl boıyna sapaly ónimdi ósirýge múmkindik bermek.

Jylyjaıda ortasha temperatýra +23,+24 gradýs bolady, bul jyl boıy sapaly ónim alý úshin jetkilikti. Ázirge, óńirdegi eń úlken jylyjaı», - deıdi «Zelenyı Sever» JShS dırektory Ekaterına Asaenok.

Nysan qazirgi ýaqytta 80% daıyn, terezeleri salynyp, kommýnıkatsııa júıesi tartylyp jatyr. Munda 60 myń tekshe metr qunarly topyraq jetkizildi.

Mamandardyń aıtýynsha, jylyjaı tamyz aıynyń sońynda paıdalanýǵa beriledi. Nysanda jańadan 65 jumys orny ashylmaq.