SQO-daǵy 4 eldi mekenniń turǵyndary úılerine oraldy

ASTANA. QazAqparat - Soltústik Qazaqstan oblysynda Esil ózeniniń kóterilýine baılanysty kóshirilgen Bolshaıa Malyshka, Barnevka, Olshanka jáne Dolmatovo aýyldarynyń turǵyndary úılerine oraldy, dep habarlaıdy Habar 24 telearnasy.

Qazir sýdyń deńgeıi túsip, tasqyn qaýpi seıilgen. Degenmen shuǵyl qutqarý jasaǵy jaǵdaıdy qatań qadaǵalaıdy. Mamandar arnasy tolǵan Esil ózenin saǵat saıyn baqylap, aldyn alý sharalaryn júrgizip jatyr. Turǵyndarǵa eskertý jasaldy. Tehnıkalar daıyn. Polıtseıler de kúni-túni kezekshilik etedi. Kómekke Astana jáne Pavlodar qalalarynyń qutqarýshylary da kelgen.

Aıta keteıik, keshe Esil ózeni arnasynan asyp, qaýipti aýmaqtardan 160-tan astam adam kóshirilgen bolatyn.

«Kelgeli adamdardy evakýatsııaladyq. Sýdyń deńgeıi búgin 2 santımetrge tústi. Adamdarǵa kómek kórsetemiz. Qappen qum tasyp, sol sýdy toqtatýdamyz. Barlyq jumystardy atqaryp jatyrmyz», deıdi qutqarýshy Nurbolat Dodaı.