SQO-daǵy erler kolonııasynda esh jerde balamasy joq eki qabatty tigin tsehy ashyldy
SQO boıynsha qylmystyq-atqarý júıesi departamenti baspasóz qyzmetiniń málimetinshe, eki qabatty modýldik ǵımaratta «Eńbek-Qyzyljar» RMK-nyń tigin tsehy men oqý synyby ornalasqan. Nátıjesinde bul nysanda 80 sottalǵan jumyspen qamtylmaq.
Ǵımarat 450 sharshy metrdi alyp jatyr. Qurylys aıaqtalǵannan keıin modýldik ǵımaratta barlyq qajetti jabdyqtar ornatyldy. Sonymen qatar, jumysshylardy, ıaǵnı tiginshilik daǵdylary bar 18 sottalǵan irikteý arqyly jumysqa alyndy. Jaqyn arada taǵy 60 adamdy óndiriske tartý josparlanǵan.
«Osyndaı modýldik ǵımaratty biz birinshi bolyp qoldanyp jatyrmyz, ıaǵnı respýblıka boıynsha balamasy joq. Ereksheligi - bul nysan tez jınalyp, qurastyrylady. Kerek bolǵan jaǵdaıda ony bólshektep jańadan kez-kelgen jerde turǵyzýǵa bolady.
Birinshi qabatta tigin mashınkalary ornalasqan, al ekinshi qabatta oqý synyby bar. Oqytý dýaldy júıe boıynsha júzege asyrylady. Sottalǵandar birden teorııada alǵan bilimderin birinshi qabatqa túsip, pysyqtap, qoldana alady», - deıdi SQO boıynsha QAJD bastyǵy Murat Nákenov.
Tigin tsehynyń ashylý saltanatyna kelgender nysandy aralap, jasalǵan jaǵdaıdy kórdi.
«Jol kartasynyń is-sharalaryn oryndaý aıasynda jergilikti atqarýshy organdarmen birlesip, mekeme aýmaǵynda alǵash ret osyndaı iri jobany iske asyrý múmkin bolyp otyr. Joba bilikti kadrlardy daıarlaý jáne sottalǵandar úshin jańa jumys oryndaryn qurý maqsatynda júzege asyryldy», - deıdi Murat Nákenov.
Mekeme aýmaǵynda barlyǵy 7 jeke kásipker jumys istep, sottalǵandardy eńbekpen qamtyp otyr. Olar kúnbaǵys maıyn shyǵarady, jumsaq jıhazdardy jınaýmen, at ábzelderin, aǵashtan jasalǵan qurylys materıaldaryn jasaýmen, kókónister ósirýmen jáne makýlatýrany qaıta suryptaýmen aınalysady Búgingi tańda mekemede 126 sottalǵan jumysqa ornalastyrylǵan.
Buǵan deıin SQO-da bıyl zorlyq-zombylyqqa qatysty 12 bala otbasynan alynǵanyn jazǵan edik.