SQO-daǵy 200-deı aýylǵa sý qubyry tartylmaǵan

<p>PETROPAVL. KAZINFORM &ndash; Soltústik Qazaqstan oblysy halqyn sapaly aýyz sýmen qamtamasyz etýde sheshimin kútken másele bar. Óńirdiń 42,5 myń turǵyny sýdy tasyp ishýge nemese jergilikti sý kózderin paıdalanýǵa májbúr.</p>

Foto: SQO prokýratýrasy

SQO prokýratýrasynda zańdylyqty, quqyq tártibin jáne qylmysqa qarsy kúresti qamtamasyz etý jónindegi úılestirý keńesiniń otyrysy ótti. Qaralǵan máselelerdiń biri – óńir halqyn aýyz sýmen qamtý jaǵdaıy.

Jıynda belgili bolǵandaı, óńirdegi 42,5 myń turǵyny bar 202 aýylda sý qubyry joq, oblystaǵy bar sý qubyry 35% tozǵan. Sonyń ishinde Petropavlda sý berý jelisi 58%, Aqjar aýdanynda 49% jáne Aqqaıyń aýdanynda 43% eskirgen.

Foto: SQO prokýratýrasy

Prokýrorlardyń aıtýynsha, sýmen jabdyqtaýdyń jekelegen kózderi ıesiz tur, keıbiri sanıtarlyq normalarǵa sáıkes kelmeıdi, sýdy tutynýǵa bekitilgen tarıfter joq. Sondaı-aq keı sý berý nysandary sapasyz salynǵan, ne bolmasa jóndelgen, keıbirinde qalpyna keltirý uzaqqa sozylyp ketken.

Aýyz sýdy tutynýdy esepke alý qajettiligi de jıynda basa nazar aýdarylady.

Foto: SQO prokýratýrasy

Talqylaý qorytyndysy boıynsha jergilikti atqarýshy organdarǵa, tabıǵı monopolııalar sýbektilerine jáne sanıtarııalyq-epıdemıologııalyq qyzmet organdaryna jaǵdaıdy jaqsartý jáne oblystyń árbir turǵynyn sýmen qamtamasyz etý boıynsha usynystar berildi.

Foto: SQO prokýratýrasy

Buǵan deıin SQO-da bıdaıdyń elevatorlarǵa syımaı jatqandyǵyn jazǵan edik.