SQO-da jylytý maýsymyna jaýapty sheneýnikter jazalandy
SQO ákimi Qumar Aqsaqalov atap ótkendeı, jylytý maýsymyna daıyndyq máselesi eki ret qaralyp, Petropavl ákiminiń jeke jaýapkershiligine júktelgen.
«Qyrkúıektiń basynda-aq keıin qalyp jatqanyn baıqadyq. Jumysty kúsheıtip, 1 qazanǵa deıin aıaqtaý týraly tapsyrma berildi. Barlyǵy jumystardyń baqylaýǵa alynǵanyn málimdedi. Barlyq úılerdiń 1 qazanǵa daıyn bolýy tıis ekendigi týraly keste bekitildi. Kórip otyrǵanymyzdaı, 25 qyrkúıekte jylytý maýsymy bastaldy. Petropavl qalasynyń jeke aýdandaryna jylý berilgen, alaıda, shyn máninde jylý bolmaǵan. Bul - jóndeý jumystaryna baılanysty dep túsindirilýde, ony júrgizýge qarjy kesh bólingen», - dedi Qumar Aqsaqalov.
Oblys ákimi kóp jyldan beri jylytý maýsymynyń 25 qyrkúıekten bastalyp kelgeni jaıly túsindirýdi nazarǵa almady.
«Biz ony tekserdik. Biraq, temperatýra basqasha bolǵan. Qazirgiden áldeqaıda jyly edi. Qarjy shildede berildi. Bul da másele bolyp pa? Jóndeý jumystary tańǵy 9-dan keshki altyǵa deıin ǵana jalǵasqan. Biz sol jerde turatyn adamdardan arnaıy surastyrdyq», - dedi óńir basshysy.
Oblys ákimin Petropavl ákimdiginiń qol qoıǵan 10 qazanǵa deıin úılerge jylý berý kestesi ashýlandyrdy. Qumar Aqsaqalov sınoptıkterdiń qystyń erte túsetini týraly eskertkenin atap ótti.
«Munyń bári óz mindetine jaýapsyz qaraýdy bildiredi. SQO ákiminiń orynbasary Anton Fedıaev pen Petropavl ákimi Marat Tasmaǵanbetovke sógis beremin. Energetıka jáne turǵyn úı-kommýnaldyq sharýashylyǵy basqarmasynyń basshysy Tasmurat Qatqadamovtyń qyzmetine tolyqtaı sáıkes kelmeıtindigin jarııalaımyn», - dedi SQO ákimi.
Óńir basshysy «Sevkazenergo» AQ jylýmen qamtamasyz etilgen, biraq temperatýra rejımine sáıkes kelmeıtin turǵyndar úshin jylytý tólem shottaryn berýge quqyly emes dep sanaıdy.