SQO-da jyl basynan beri kamera kómegimen 300-den astam ákimshilik quqyq buzýshylyq anyqtaldy

PETROPAVL. QazAqparat -  Petropavlda jyl basynan bastap jedel basqarý ortalyǵynynń vıdeobaqylaý kameralary 300-den astam ákimshilik quqyq buzýshylyqty anyqtady, dep habarlady SQO ІІD baspasóz qyzmetine silteme jasap «QazAqparat» HAA tilshisi.

JBO qyzmetkerleri táýlik boıy jumys isteıdi. Olardyń mindetine polıtsııa keshendi kúshteriniń jumysyn úılestirý, vıdeo baqylaý kamerasynyń kómegimen qylmystar men zań buzýshylyqty anyqtaý jáne aldyn alý jatady.

«Petropavlda 74 syrtqy vıdeobaqylaý júıesi jumys isteıdi. Osy jyly 11 kúnde olardyń kómegimen 303 ákimshilik quqyq buzýshylyq anyqtaldy. Onyń 220-sy jol júrý qaǵıdasyn, 83-i qoǵamdyq tártipti buzǵandar. 3 qylmystyq is ashyldy», - dedi JBO bastyǵy Samat Qusbekov.

Polıtseıler mysalǵa dámhanalardan kúzen tonyn urlaý faktisin keltiredi. Túnde JBO kezekshi-ınspektory Gúlmıra Daıyrshına   «Fantazııa» dámhanasynan qolyna ton ustaǵan boıjetken asyǵa shyǵyp, ony kútip turǵan taksıge minip ketkenin baıqaǵan. Ol muny jedel topqa habarlaǵan.

Boıjetken   dámhanaǵa kelýshilerdiń biriniń tonyn urlaǵany anyqtaldy. Krımınalıster saýsaq tańbasy boıynsha izdeý júrgizip, 39 jastaǵy Petropavl turǵynyn ustady. Ury qylmysyn moıyndap, urlanǵan zatty ıesine qaıtardy.

JBO qyzmetkerleri tehnıkalyq múmkindik qaladaǵy jaǵdaıdy baqylaýǵa úlken kómek berip otyrǵanyn atap ótti. Ornatylǵan kameralar kúndiz  rýlde telefon qoldanǵandardy, júrgizýshilerdiń, jolaýshylardyń qaýipsizdigin beldik taqqan-tappaǵanyn birden túsirip alady.

2016 jyly vıdeokamera kómegimen polıtseıler túrli sıpattaǵy 19 344 ákimshilik zań buzýshylyqty anyqtady.