SQO-da jyl basynan beri 936,3 mln teńgeniń zań buzý áreketteri anyqtaldy

PETROPAVL. QazAqparat - Soltústik Qazaqstan oblysynda birinshi toqsanda 38 aýdıtorlyq tekseris júrgizildi. 1 523,2 mln teńge bıýdjet qarajatynyń maqsatty jumsalýy nazarǵa alynyp, nátıjesinde 936,3 mln teńge boıynsha zańbuzýshylyq anyqtaldy, dep habarlaıdy QazAqparat tilshisi.

Sonyń ishinde 1 308,8 mln teńge memlekettik satyp alý zańnamasynyń oryndalýy boıynsha tekserilip, 574,2 mln teńge zańsyz shyǵyndalǵany belgili boldy.

Іshki aýdıt departamenti mamandarynyń aıtýynsha, kameraldyq baqylaý barysynda da kóptegen zańbuzýshylyqtar anyqtalǵan. Keıbir bıýdjettik uıymdar men memlekettik organdar zańdy belshesinen basyp, óz talaptaryna baǵynbaǵandardy konkýrsqa qatystyrmaı qoıǵan.

«Kameraldyq baqylaý júıesi boıynsha jıyntyq quny shamamen 82 mlrd teńgeniń 25 myńǵa jýyq lotyn tekserdik. Nátıjesinde 12 mlrd teńgeniń zańbuzýshylyǵy anyqtaldy. Bul - 324 lot. Konkýrsty uıymdastyrýshylar qıturqy áreketterdi kóp oılap tabady. Zańdaǵy sharttardy ysyryp tastap, ózderi oılap tapqan erejemen jumys isteıdi. Turǵyndardan basy artyq qujattar suratady», - deıdi SQO boıynsha ishki memlekettik aýdıt departamentiniń bólim basshysy Erdos Bagenov.

Zańbuzýshylyqtarǵa jol berilgeni úshin 1 659,3 myń teńge boıynsha 19 ákimshilik is júrgizilip, barlyq soma bıýdjet kirisine óndirilip alynǵan.