SQO-da jyl basynan beri 300-den astam ınternet-alaıaqtyq tirkelgen

PETROPAVL. QazAqparat – Soltústik Qazaqstan oblysynda bıyl ınternet-alaıaqtyqqa qatysty 337 derek tirkelse, sonyń tek 53-i ǵana óndirispen aıaqtalǵan, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Petropavldyń 65 jastaǵy turǵyny «Odnoklassnıkı» áleýmettik jelisindegi habarlandyrý boıynsha kostıým satyp almaq nıetpen «satýshyǵa» 9500 teńge aýdarǵan. Keıin ol adam telefonǵa jaýap bermeı qoıǵan.

Oblys ortalyǵynyń 21 jastaǵy turǵyny «Kolesa.kz» saıtyndaǵy habarlandyrý boıynsha «Mercedes» avtokóligine arnalǵan berilis qoraby úshin 132 myń teńge aýdarǵan. «Satýshy» ózin Qaraǵandynyń turǵynymyn dep tanystyryp, sózine dálel retinde jeke kýáliginiń fotosyn jibergen. Aqshany alǵannan keıin, birden baılanysty úzgen.

Petropavl qalasy birinshi polıtsııa bóliminiń jedel ýákilderi jeke kýálik ıesi - qaraǵandylyqtyń alaıaqtyqqa qatysy joqtyǵyn anyqtady. Birde ol óz qujattarynyń fotosýretin bir uıymǵa senip tapsyrǵan. Onyń derekteri alaıaqtardyń qolyna túsken, al olar qujatty ańǵal adamdardy aldaý úshin birneshe ret qoldanǵan.

Petropavl qalalyq polıtsııa basqarmasynyń bastyǵy Jandos Muqatov turǵyndarmen onlaın baılasyqa shyǵyp, halyqty ınternet-alaıaqtyqtan saqtanýǵa shaqyrdy.

«Petropavlda ınternet-alaıaqtyq 68,5 %-ke artty. Jyl basynan beri 337 fakti tirkelip, onyń 53-i óndirispen aıaqtaldy. Kúdiktilerdi anyqtaý ońaı emes. Internet qylmystyń kópshiligi transshekaralyq sıpatta, ol degenimiz – jábirlenýshi men alaıaqtyń eki óńirde, keı jaǵdaıda basqa el de bolýynda. Qańtar aıynan bastap krımınaldyq polıtsııa bóliminiń qyzmetkerleri 12 qyzmettik issaparǵa shyǵyp, onyń barysynda 34 kúdiktini anyqtady», - deıdi Jandos Muqatov.