SQO-da jyl basynan beri 150-den astam ınternet alaıaqtyq tirkeldi

PETROPAVL. QazAqparat – Soltústik Qazaqstan oblysynda polıtseıler ınternet-alaıaqtyqpen kúresý maqsatynda chellendj bastap, volonterlermen birge aýyl-aýyldy aralaı bastady, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, sońǵy ýaqytta ınternet-alaıaqtyqtyń sany eselep ósken.

Osyǵan oraı polıtseıler volonterlerdiń, prokýratýra qyzmetkerleriniń kómegimen chellendj bastady.

Bastamanyń avtory - Mamlıýt aýdany polıtsııa bólimi basshylyǵy.

Ledenevo aýylyna kelgen top osyndaǵy 178 shańyraqtyń árqaısysynda bolyp, turǵyndarǵa alaıaqtyqtyń keń taraǵan aıla-amaldary týraly aıtyp berdi, sondaı-aq profılaktıkalyq kitapshalar taratty.

Chellendjdi Voskresenovka aýyldyq okrýgine tabystady.

«Bıyl aýdan aýmaǵynda bir ınternet-alaıaqtyq tirkeldi. Er adam «Mazda» avtokóligine qosalqy bólshekter satatyny jaıynda ınternetke habarlandyrý bergen alaıaqqa 180 myń teńgesin aýdarǵan. Aldyn ala tólem alǵan alaıaq, baılanysqa shyqpaı qoıǵan. Qazirgi ýaqytta qylmystyń beti ashylyp, jábirlenýshige shyǵyn tolyǵymen óteldi. Bizdiń mindetimiz – halyqty qaýip týraly aldyn ala aqparattandyrý», - deıdi Mamlıýt aýdany polıtsııa bóliminiń bastyǵy Serik Áljanov.

Mamandardyń aıtýynsha, sońǵy kezde alaıaqtyqtyń beleń alǵan túri – «bank qaýipsizdik qyzmetkeri bolyp telefon soǵý».

Sondaı-aq qylmyskerler burynǵysynsha aldyn ala tólem jasaýdy talap etýmen taýarlar satý týraly jalǵan habarlandyrýlar berýdi keńinen qoldanady.

Internet arqyly zattaryn satyp jatqan adamdarǵa qylmyskerler ózderin satyp alýshy retinde tanystyryp, WhatsApp arqyly jetkizý qyzmeti saıtyna silteme joldap, ótinimdi rastaýyn suraıdy.

Onda engizilgen málimetter qylmyskerlerdiń oljasyna aınalady jáne ol arqyly qurbandarynyń esep shottaryna qol jetkizedi.

Jyl basynan SQO-da 150-den astam ınternet-alaıaqtyq tirkeldi.