SQO-da jyl basynan 460 ınternet alaıaqtyq tirkeldi
SQO polıtsııa departamenti baspasóz qyzmetiniń málimetinshe, ınternet alaıaqtyq qylmysy jyl sanap artyp keledi. Bıyl óńirde 460 deregi tirkelgen, bul ótken jylmyn salystyrǵanda eki ese kóp. Qylmystyń bul túrin ashý ońaı emes, óıtkeni qaskúnemder oblys aýmaǵynan alysta, tipti shetelde otyryp áreket etýi múmkin. Bıyl ustalǵan kúdiktilerdiń tek 21-i ǵana oblys turǵyny bolsa, qalǵandary basqa oblystarda, elderde turady.
«Jasalǵan qylmystardy saraptaı kele baıqaǵanymyz, alaıaqtar taýarǵa da, kórsetiletin qyzmetke de aldyn ala tólem jasaýdy suraıdy. Qaskúnemder tanymal habarlandyrý saıttarynda óz qurbandaryn izdeıdi. Máselen OLx.kz saıtynda osyndaı 153 habarlandyrý anyqtaldy. Biraq olar kez-kelgen ınternet-alańda jumys isteı berýleri múmkin. Instagram paraqshasynda - 49, Kolesa.kz saıtynda – 11, basqa áleýmettik jelilerde 11 jalǵan habarlandyrý tabyldy. Olar naryqta ne suranysqa ıe, sony usynady. Ol qyzmet, ne taýar bolýy múmkin. Jańa oqý jyly qarsańynda jalǵa beriletin páterlerge qatysty jalǵan habarlandyrýlar kóbeıdi, osyndaı segizin anyqtadyq», - deıdi SQO PD krımınaldyq polıtsııa basqarmasynyń aǵa jedel ýákili Vıtalıı Podchernın.
Tártip saqshysynyń aıtýynsha, ekinshi keń tarlǵan ınternet alaıaqtyq – «bankten qońyraý shalý». Alaıaqtar ózderin banktiń qaýipsizdik qyzmetkerimen dep tanystyryp, habarlasyp turǵan adamynyń jeke málimetterin, bank shotynyń nómirin, sms-pen kelgen qupııa sózdi alýǵa tyrysady.
«Búginde alaıaqtyqtyń túr-túri bar. Keıbiri aınalymǵa aqsha alyp, paıyzyn ósirip beremin dep ýáde etedi. Endi biri jumysqa ornalastyramyn dep aqsha alsa, taǵy biri «syılyqtardy» oınatady. Kıberqylmyskerler kompıýterdegi málimetke qol jetkizý úshin alystan basqarýǵa bolatyn qosymshalardy túrli syltaýlarmen ornatýdy usynady. Sondyqtan turǵyndardy abaı bolýǵa, ınternet arqyly saýda jasaǵanda aldyn-ala tólem jasamaýǵa, tanymaıtyn adamdarǵa jeke málimetterdi bermeýge shaqyramyz», - deıdi Vıtalıı Podchernın.