SQO-da jumys isteıtin áıelderdiń jartysy óz kásibin dóńgelentip otyr

PETROPAVL. QazAqparat – Soltústik Qazaqstan oblysynda «Qyzyljar Development Days» atty úsh kúndik konferentsııa ótip jatyr. Maqsat – kásipker áıelderdiń ekonomıkalyq quqyǵy men múmkindigin ulǵaıtý, dep habarlaıdy QazAqparat tilshisi.

SQO kásipkerler palatasy baspasóz qyzmetiniń málimetinshe, kásipker áıelderge arnalǵan úsh kúndik jıyndy palata janyndaǵy isker áıelder keńesi uıymdastyrǵan.

«Qazaqstanda qazirgi ýaqytta shaǵyn óz isin damytyp jatqan áıelderdiń úlesi 50 % jáne bul kórsetkish jyldan jylǵa artyp keledi. Orta jáne iri bızneste qyz-kelinshekterdiń úlesi az. Bul ósý krızısine baılanysty. Bul qandaı termın, ony qalaı baǵyndyrý kerek – konferentsııa barysynda trenıngter ótip, arnaıy shaqyrylǵan mamandar osy jaıynda aqyl-keńes beredi. Bizdiń maqsatymyz – áıelderimizdiń ári qaraı damýyna, qıyndyqtardy qoryqpaı eńserýine kómektesý. Bul úsh kúndik jıyn kásipker áıelderge ǵana emes, memlekettik qyzmette júrgen jáne depýtat qyz-kelinshekterge de paıdaly bolmaq», - deıdi SQO kásipkerler palatasy janyndaǵy isker áıelder keńesiniń tóraǵasy Ásel Esjanova.

Qazirgi ýaqytta SQO-da 142 myń áıel eńbek etedi. Sonyń teń jartysyna jýyǵynyń óz kásibi bar.

«Áıel kásipkerler ekonomıkaǵa aıtarlyqtaı úles qosyp keledi. Olar jańa kásiporyndar ashyp, ónim óndirýde, qyzmet kórsetip jatyr jáne jumys oryndaryn ashýda. Budan basqa 38 myń áıel ózin-ózi jumyspen qamtyp otyr. Memleket te bızneske barynsha qoldaý kórsetip keledi», - deıdi SQO kásipkerler palatasynyń jetekshisi Tımýr Bekeev.

Naýryz aıynda osy maqsatta kásipkerler palatasy janynan áıelder kásipkerligin damytý ortalyǵy ashylyp, jumys istep jatyr.

«7 aıdyń ishinde 350 áıel bizdiń kómegimizge júgindi. Olardyń keıbiri birneshe qyzmet túrin aldy. Qazirgi ýaqytta 100 shaqty qyz-kelinshekti oqyttyq. Olar naryqta suranysqa ıe mamandyqtar – «vızaj», «massaj jasaý», «is tigý» sııaqty kýrstardan ótti, jańa kásip meńgerdi», - deıdi osy ortalyqtyń keńesshisi Irına Vasıleva.