SQO-da jol apatyna sebepker bolǵan jylqynyń ıesi qamalýy múmkin

PETROPAVL. QazAqparat – Soltústik Qazaqstan oblysynda «Nissan Primera» kóligi jolǵa shyǵyp ketken jylqyny soqty, bári aman, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, oqys oqıǵa 3 naýryz kúni Aqjar aýdanynda bolǵan.

«Kókshetaý-Omby» respýblıkalyq avtojolynyń 178 shaqyrymynda «Nissan Primera» avtokóliginiń 40 jastaǵy turǵyny jolǵa shyqqan jylqyny soǵyp ketken.

Jylqy da, júrgizýshi de aman, kólik zaqymdandy.

Oqıǵa ornyna aýdandyq polıtsııa bólimshesiniń jedel-tergeý toby bardy. Jylqy aýyl turǵyndarynyń jylqysyn baǵatyn jylqyshyǵa, 40 jastaǵy aýyl turǵynyna tıesili eken.

Ol «Aýyl sharýashylyǵy janýarlaryn jaıý qaǵıdalaryn, ıtter men mysyqtardy asyraý jáne serýendetý qaǵıdalaryn, qańǵybas ıtter men mysyqtardy aýlaý jáne joıý qaǵıdalaryn buzý» baby boıynsha qylmystyq jaýapkershilikke tartyldy.

Sonymen qatar, «Jaıaý júrginshilerdiń jáne jol júrisine ózge de qatysýshylardyń jol júrisi qaǵıdalaryn buzý» baby boıynsha materıaldar jınalyp, sotqa joldandy.

Osy bap boıynsha tártip buzýshyǵa 20 AEK mólsherinde aıyppul salynady nemese 3 táýlikke qamaýǵa alynady.

«Buryn bul jylqyshy bes ret mal baǵý erejesin buzǵany úshin ákimshilik jaýapkershilikke tartylǵan. Ótken jyldyń qyrkúıeginde osy adamnyń jaýapsyzdyǵy saldarynan jolda apat boldy. Aýdandyq polıtsııa bóliminiń qyzmetkerleri erkin mal jaıylymyna baılanysty qylmystar men quqyq buzýshylyqtardyń aldyn-alý jumystaryn júrgizýde. Jyl basynan beri aýdanda bos júrgen malǵa qatysty 21 ákimshilik hattama toltyryldy. Mal urlyǵy faktileri bolǵan joq», - deıdi Aqjar aýdandyq polıtsııa bóliminiń bastyǵy Erkin Mahmetov.