SQO-da jol apatynan eki adam mert bolyp, úsheýi jaraqattandy
Jol-kólik apaty 25 qyrkúıek kúni boldy. «Astana-Petropavl» tasjolynyń Astrahanka-Aralaǵash eldi mekenderiniń ortasynda Daewoo Nexia men KamAZ júk kóligi soqtyǵysyp qalǵan. Kýágerlerdiń aıtýynsha, jeńil kólik júk kóliginiń artyna kirip ketken.
SQO polıtsııa departamenti baspasóz qyzmetiniń málimetinshe, jol-kólik oqıǵasy faktisi boıynsha qajetti saraptamalar men tergeý bastaý úshin polıtsııa qyzmetkerleri materıaldar jınap jatyr.
«25 qyrkúıek kúni Astana — Petropavl avtojolynyń 435-shi shaqyrymynda Daewoo Nexia jeńil kóligi men KamAZ 54105 júk kóligi soqtyǵysyp qaldy. Jol-kólik oqıǵasy saldarynan avtokóliktiń 40 jastaǵy júrgizýshisi men 39 jastaǵy jolaýshysy alǵan jaraqattardan oqıǵa ornynda kóz jumdy. Osy avtokóliktiń túrli jaraqat alǵan 17, 19 jáne 62 jastaǵy jolaýshylary jedel járdem kóligimen medıtsınalyq mekemelerge jetkizildi. QR QK 345-babynyń 4-bóligi boıynsha sotqa deıingi tergeý bastaldy. Qazirgi ýaqytta jol-kólik oqıǵasynyń búkil mán-jaıyn zerdeleýge baǵyttalǵan tergeý júrgizilip jatyr. Onyń nátıjesi boıynsha túpkilikti protsestik sheshim qabyldanady», — dedi vedomstvonyń baspasóz hatshysy Mádına Erǵalıeva.
SQO densaýlyq saqtaý basqarmasy baspasóz qyzmetiniń málimetinshe, jaraqattanǵan úsh adam Aqqaıyń aýdandyq ortalyq aýrýhanasyna jetkizildi.
Keıin zardap shekkenderdiń bireýi — 17 jastaǵy jasóspirim oblystyq kópbeıindi balalar aýrýhanasyna jatqyzyldy.
«Apat kezinde túrli synyq alǵan taǵy eki adamnyń bireýi Petropavlǵa jetkizildi. Búgin úshinshi turǵyndy da Petropavl qalalyq kópbeıindi aýrýhanaǵa tasymaldaý týraly sheshim qabyldandy», — dep habarlady oblystyq densaýlyq saqtaý basqarmasynyń baspasóz qyzmeti.
Buǵan deıin SQO-da jyl basynan beri áıelderge qatysty zorlyq-zombylyq eselep artqanyn jazǵan edik.