SQO-da jol apatynan bir adam qaıtys boldy, tórteýi aýrýhanaǵa jetkizildi

<p>PETROPAVL. KAZINFORM &ndash; Soltústik Qazaqstan oblysynda respýblıkalyq mańyzy bar jolda júk kóligi men jeńil mashına soqtyǵysty.</p>

SQO polıtsııa departamenti baspasóz qyzmetiniń málimetinshe, oqıǵa búgin «Jezqazǵan-Petropavl» tas jolynda, Esil aýdanynyń Pokrovka men Petrovka eldi mekenderiniń aralyǵynda bolǵan. "Howo" jáne "Toyota Camry" kólikteri soqtyǵysyp, saldarynan jeńil mashınanyń 43 jastaǵy júrgizýshisi sol jerde kóz jumdy. 

Toyota Camry kóliginiń tórt jolaýshysy: 45, 20 jastaǵy eresekter jáne 16 men 17 jastaǵy jasóspirimder túrli jaraqatpen emdeý mekemelerine jetkizildi. 

Howo rýlinde 62 jastaǵy er adam bolǵan. Medıtsınalyq kýálandyrý onyń spırttik ishimdik ishpegenin kórsetti. 

Qazirgi ýaqytta tártip saqshylary tergeý amaldaryn júrgizip, tıisti saraptamalar jasap jatyr.