SQO-da jylýmen qamtıtyn 11 kásiporynnyń tutynýshylaryna 24 mln teńge bereshegi bar

<p>PETROPAVL. KAZINFORM &ndash; Soltústik Qazaqstan oblysynda ótken jylytý maýsymynyń qorytyndysy boıynsha tabıǵı monopolııalardyń 11 sýbektisi 24 myńnan astam tutynýshyǵa qaryz ekeni anyqtaldy.&nbsp;</p>

Tabıǵı monopolııalardy retteý komıtetiniń SQO boıynsha departamentiniń basshysy Damır Toqtamysovtyń aıtýynsha, tutynýshylardyń quqyǵyn qorǵaý maqsatynda jylý berýshi kompanııalarmen birge qaıta esepteý júrgizildi. Bul – ortalyqtandyrylǵan jylý jelisine qosylǵan, alaıda úılerinde arnaıy esepteý quraly joq turǵyndarǵa qatysty.

– 2023-2024 jylǵy jylý berý maýsymy qorytyndylandy. Esep kezinde daladaǵy naqty aýa temperatýrasy eskerildi. Nátıjesinde 11 tabıǵı monopolııa sýbektisi 24 mln 136 myń teńgeni 24 452 turǵynǵa qaıtaratyn boldy. Búginge deıin 6 sýbekti tutynýshylar aldyndaǵy qaryzynan tolyq qutyldy. Qalǵan beseýi osy jyldyń sońyna deıin qaıta esepteý júrgizedi, - dedi Damır Toqtamysov.

Bereshektiń jartysyna jýyǵy «Sevkazenergosbyt» JShS-ge tıesili. Kásiporyn Petropavldyń 20 380 turǵynyna 11 mln teńgege jýyq qaıtarýy tıis. 

– Óńirde 57 tabıǵı monopolııa sýbektisi bar. Olardyń 47-si tarıftik smetanyń oryndalýy boıynsha 49 jáne 2023 jylǵa bekitilgen ınvestıtsııalyq baǵdarlamanyń oryndalýy boıynsha 7 esep berdi. Sot arqyly taǵy jeteýi tıisti 9 esepti usyndy.

62 esepti qaraý barysynda tabıǵı monopolııa sýbektisiniń negizsiz kirisi anyqtaldy. Osyǵan baılanysty 16 kompanııaǵa 20 qyzmet boıynsha tutynýshylarǵa jalpy somasy 151 311,45 myń teńgege ýaqytsha ótemdik tarıf engizildi, - deıdi departament basshysy.

Buǵan deıin Petropavldaǵy «Bıotoǵan» — sarqyndy sý jınaqtaǵysh aınalasyndaǵy bóget nyǵaıtylyp jatqanyn jazǵan edik.