SQO-da jylytý maýsymy bastalǵaly órtten 8 adam mert boldy

<p>PETROPAVL. KAZINFORM &mdash; Soltústik Qazaqstan oblysynda jyl basynan beri 376 órt boldy, sonyń 55-i jylytý maýsymy bastalǵaly tirkeldi. Kóp jaǵdaıda pesh pen elektr qurylǵylaryn paıdalanýda órt qaýipsizdigin saqtamaý sebep bolǵan.</p>

SQO tótenshe jaǵdaılar departamenti bastyǵynyń orynbasary Dmıtrıı Rastıhınniń aıtýynsha, bıyl órtten 29 adam mert boldy, taǵy 5 adam ıis tıip kóz jumǵan. Jaraqattanǵandar sany 42% artqan. Bıyl 34 adam órt kezinde jaraqat alsa, 21-i — kómirqyshqyl gazyna ýlanǵan.

«275 jaǵdaı nemese órttiń 74% jeke turǵyn úı sektorynda boldy. Qarapaıym qaýipsizdik erejesi saqtalmaıdy, peshtiń durystyǵyna kóńil aýdarylmaıdy. 
Aldyn alý úshin 75 myńnan astam úıdi aralap shyǵyp, túsindirý jumysyn júrgizdik. Onyń ishinde spırttik ishimdikterdi mólsherden tys paıdalanatyndar da bar.
Jylytý maýsymy bastalǵaly órtte 8 adam, sonyń ishinde bir bala mert boldy. Bir adam ıis tıip kóz jumdy. 8 mln teńgeniń materıaldyq shyǵyny keldi», — deıdi Dmıtrıı Rastıhın.

Qazirgi ýaqytta 11 myńnan astam turǵyny bar 4,5 myńǵa jýyq jeke turǵyn úı vedomstvonyń esebine alynǵan. Munda turmysy tómen otbasylar turady. Bul úılerdiń 3,6 myńyna tútin jáne kómirqyshqyl gazy datchıgi ornatylǵan. Tekserý kezinde 1,3 myń baspanada órt qaýipsizdigi erejeleriniń buzylǵandyǵy anyqtaldy. 

«Ótken aptada respýblıka boıynsha birneshe tótenshe jaǵdaı tirkelip, 12 adam qaza tapty. Sol sebepti turǵyndardan eskertýge beıjaı qaramaı, úıdegi peshtiń, elektr jelileriniń jaǵdaıyn jáne elektr jylytqyshtar bolsa, onyń durys istep turǵanyn tekserýdi suraımyn. Peshtiń qaqpaǵynyń aldynda mindetti túrde qańyltyr tóseme bolýy tıis. Peshti jaǵyp, ony qaraýsyz nemese balaǵa senip qaldyrý jáne otyndy tutatýǵa benzın, kerosındi qoldaný qaýipti ekenin eskertemiz», — deıdi Dmıtrıı Rastıhın.

Buǵan deıin Petropavldaǵy jolaýshy tasymalyna qosymsha sýbsıdııa berilgenin jazǵan edik.