SQO-da jerge qatysty apellıatsııalyq sot paıshylardyń múddesine sheshildi

PETROPAVL. QazAqparat – Soltústik Qazaqstan oblysy sotynyń apellıatsııalyq satysy 880 paıshy men kredıttik mekeme arasyndaǵy 14 kepilsharttyń kúshin joıýǵa qatysty sheshimdi ózgerissiz qaldyrdy, dep habarlaıdy QazAqparat tilshisi.

SQO prokýratýrasynyń málimetinshe, 15 aqpanda oblystyq sottyń apellıatsııalyq satysynyń qaýlysymen 2022 jylǵy 9 jeltoqsandaǵy oblystyq mamandandyrylǵan aýdanaralyq ekonomıkalyq sotynyń sheshimi ózgerissiz qaldy. Aıyrtaý aýdanynyń prokýrory «Jarqyn SK» JShS-niń shartty jer úlesteriniń 880 ıegeriniń múddesin qorǵap, «Agrarlyq kredıttik korporatsııa» AQ men «Jarqyn-SK» JShS arasyndaǵy mámilelerdi jaramsyz dep taný týraly talap aryz bergen edi. Sot aktisimen eki jaq arasynda jasalǵan 14 kepilsharttyń kúshi joıyldy.

Jer zańnamasyn buzýǵa qatysty derekterdi anyqtaý jáne tıisti shara qoldaný, sondaı-aq paıshylardyń jer paıdalaný quqyǵyn qorǵaý prokýratýra organdarynyń basym mindetteriniń biri.

Sot otyrysynda talapker atynan shyqqan prokýratýra organy kredıttik mekemeden nesıe alý jáne oǵan múlikti kepilge berý týraly jalpy jınalystyń hattamalyq sheshimin qabyldaý rásiminiń, sondaı-aq kredıt berý tártibiniń buzylǵanyn rastaıtyn dálelderdi keltirdi. Sondaı-aq, «Jarqyn-SK» JShS-i atqarýshy organynyń qylmystyq áreketterin rastaıtyn qujattardy usyndy.

Sot organdary usynylǵan dáleldemelerdi nazarǵa alyp, tıisti quqyqtyq baǵa berdi.

Buǵan deıin «Jarqyn SK» JShS dırektory men burynǵy dırektoryna qatysty alaıaqtyq faktisi boıynsha sotqa deıingi tergep-tekserý júrgizilgenin aıtqan edik. Seriktestiktiń basshysy 2017 jyly qujattardy qoldan jasap, paıshylardyń jerin kepilge qoıyp, 600 mln teńgeni qaltasyna basqan. Qorytyndysy boıynsha qylmystyq ister sotqa joldandy. Sot úkimimen olarǵa bas bostandyǵynan aıyrý jazasy qoldanyldy.