SQO-da jerdi memleket menshigine qaıtarýǵa qatysty 70-ke jýyq is sotta jatyr
SQO qoǵamdyq keńestiń kezekti otyrysy jerge qatysty ótti. Oblystyq aýyl sharýashylyǵy jáne jer qatynastary basqarmasynyń málimetinshe, óńirdiń jer qory – 9,8 mln ga alyp jatyr. Onyń 7,3 mln ga nemese 74 % aýyl sharýashylyǵyna qoldanylatyn alqaptar. Búginde oblysta 3 myńǵa jýyq sharýa qojalyǵy, fermerlik sharýashylyq jáne 857 seriktestik jumys istep jatyr. Alaıda olardyń arasynda jerdi durys ıgermeı jáne maqsatty paıdalanbaı otyrǵandary bar.
«Prezıdenttiń tapsyrmasyna oraı paıdalanylmaı jatqan jáne zańsyz alynǵan jerler qaıtarylyp jatyr. Nátıjesinde 142,3 myń ga alqap memleket menshigine qaıtaryldy. SQO jer resýrstaryn basqarý departamentinde 342 myń ga boıynsha jumys atqarylýda. Qazirgi ýaqytta aýyl turǵyndarynyń qoradaǵy maldaryna jaıylymdyq jer taýyp berý máselesi ózekti. Óńir boıynsha jaıylymdyq jerge qajettilik 547,1 myń ga qurap otyr. Prokýratýra organdary eldi mekenderdiń jaıylymdaryn paıdalanýǵa qatysty tekseris júrgizip, birqatar zańbuzýshylyqty anyqtady», - deıdi SQO aýyl sharýashylyǵy jáne jer qatynastary basqarmasynyń basshysy Meıram Meńdibaev.
Málim bolǵandaı, aýyl mańyndaǵy jerler jeke jáne zańdy tulǵalarǵa jer zańnamasy buzyla otyryp berilgen. Qazirgi ýaqytta 18 myń ga jýyq alqap boıynsha sotta 71 is qaralyp jatyr.
«Sot arqyly qaıtarylǵan jerler aýyl turǵyndarynyń malyn baǵýǵa beriledi jáne osy maqsatqa qordaǵy jerlerden de jáne buǵan deıin paıdalanylmaı jatqan alqaptardan da berilýde. Osylaısha óńirde jaıylymdyq alqap 588 myń ga ulǵaıtyldy. Onyń 114,4 myń ga eldi mekenderdiń jerleri, keıbir aýylsharýashylyǵy qurylymdarymen turǵyndardyń malyn jaıýǵa qatysty memorandýmdar jasaldy», - deıdi Meıram Meńdibaev.
Al sharýa qojalyqtary men fermerlik sharýashylyqtarǵa jer konkýrs arqyly beriledi. Máselen sońǵy 5 jylda oblysta 591 myń ga alqapqa 90 konkýrs ótken. Onyń 126 myń ga egistik alqap, qalǵany jaıylymdyq jerler. Bıyl 62 myń ga alqap 14 konkýrstyń nátıjesinde sharýalarǵa berilgen.