SQO-da jeńgetaılyqpen aınalysty degen kúdikpen saýna qyzmetkeri tergelip jatyr

PETROPAVL. QazAqparat – Soltústik Qazaqstan oblysynda saýna ákimshisi klıentterge qosymsha qyzmet usynyp, jeńil júristi qyzdarmen qamtamasyz etip otyrǵan. Kúdiktige qatysty tergep-tekserý júrip jatyr, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Petropavlda uıymdasqan qylmysqa qarsy kúres basqarmasynyń jedel ýákilderine oblys ortalyǵyndaǵy saýnalardyń biriniń ákimshisiniń jeńgetaılyqqa qatysy bar bolýy múmkin degen jedel aqparat kelip túsken. Tergeý áreketteriniń nátıjesinde jedel ýákilder saýnanyń 48 jastaǵy ákimshisiniń tarapynan bolǵan jeńgetaılyq faktisin anyqtady.

Atalǵan fakti QR Qylmystyq kodeksiniń 309-babynyń 1-bóligi «Jezókshelikpen aınalysýǵa arnalǵan prıtondar uıymdastyrý nemese olardy ustaý jáne jeńgetaılyq» boıynsha Sotqa deıingi tergep-tekserýlerdiń biryńǵaı tizilimine engizildi.

«Saýna ákimshisi mekeme klıentterine ıntımdik qyzmet kórsetýge aqshalaı syıaqy úshin jeńil júristi qyzdy shaqyrǵan. Boıjetken alǵan syıaqysynyń bir bóligin shaqyrǵany úshin ákimshige bergen. Qazirgi ýaqytta bul fakti boıynsha sotqa deıingi tergeý júrgizilip jatyr. QR QK 309-babynyń sanktsııasyna sáıkes jezókshelikpen aınalysýǵa arnalǵan prıtondar uıymdastyrý nemese olardy ustaý, sol sııaqty paıdakúnemdik maqsattaǵy jeńgetaılyq úshin múlikti tárkileý jáne bes jylǵa deıingi merzimge bas bostandyǵynan aıyrý jazasy kózdelgen», - deıdi SQO PD Uıymdasqan qylmysqa qarsy kúres basqarmasy bastyǵynyń mindetin atqarýshy Rahat Nurahmetov.