SQO-da jemqorlyqqa qarsy qyzmettiń tekserisinen keıin sý tarıfi 6 esege tómendegen

PETROPAVL. QazAqparat – Qazaqstannyń soltústiginde jemqorlyqqa qarsy kúres komıtetiniń tekserisiniń arqasynda aýyzsý tarıfi aıtarlyqtaı tómendegen. Mysaly, Asanov aýylynda tekshe metri 1000 teńgeden 175 teńgege arzandaǵan, dep habarlaıdy QazAqparat Petropavlovsk.news-ke silteme jasap.

Soltústik Qazaqstan oblysynyń 50 aýylynda sýmen qamtamasyz etý tarıfteri 16-87%-ǵa tómendedi.Bul týraly Oblystyq sybaılas jemqorlyqqa qarsy is-qımyl departamentiniń basshysy Sergeı Perov Óńirlik kommýnıkatsııalar ortalyǵynda ótken brıfıngte aıtty.
Máselen, Maǵjan Jumabaev aýdanynyń 20 eldi mekeninde sý tarıfi orta eseppen 150 teńgege tómendedi. Buǵan deıin aýdanda oblysta eń joǵary tarıfter qoldanysta bolǵan (Qaraqoǵa aýyly – 375 tg, Chıstoe aýyly – 375 tg, Hleborob aýyly – 400 tg). Qyzyljar aýdany Asanov aýylynda tarıf 1 m³ úshin 1000 tg bolǵan. Sybaılas jemqorlyqqa qarsy qyzmettiń aralasýynan keıin aýdan ákimi Býlaev toptyq sý qubyrynan taratý jelisin salý jóninde shara qabyldady. Qazir tarıf shamamen 6 esege tómendep, tekshe metri 175 teńgeni quraıdy.
«Bizdiń usynysymyz boıynsha oblys ákimi tabıǵı monopolııalar sýbektilerin tikeleı sýbsıdııalaý arqyly «Bir aýyl — bir tarıf» pılottyq jobasyn iske qosý týraly sheshim qabyldady. Bul óńir turǵyndarynyń aýyz sýǵa teń qoljetimdiligin qamtamasyz etedi», - dep túsindirdi Sergeı Perov.