SQO-da jemqorlyq qylmysy úshin sottalǵandardy jumysqa alǵan eki basshy aıyppul tóledi

PETROPAVL. QazAqparat – Soltústik Qazaqstan oblysynyń sybaılas jemqorlyqpen kúres vedomstvosy bıyl shekteýlerdi buzýǵa qatysty 10 ákimshilik is qozǵap, nátıjesinde olarǵa 2,6 mln teńge kóleminde aıyppul salyndy, 6,3 mln teńge zańsyz tabys tárkilendi, dep habarlaıdy QazAqparat tilshisi.

Bul týraly Sybaılas jemqorlyqqa qarsy is-qımyl agenttiginiń SQO boıynsha departamenti basshysynyń birinshi orynbasary Nurlan Jahın memlekettik organdardyń basshylary qatysqan «Ákimshilik praktıka – sybaılas jemqorlyqtyń aldyn alýdyń tıimdi quraly» taqyrybyndaǵy keńes barysynda habarlady.

Jyl basynan beri sybaılas jemqorlyqpen kúres vedomstvosy «QR zańnamasynda kásipkerlik qyzmetti júzege asyrýǵa tyıym salý belgilengen adamnyń osyndaı qyzmetpen aınalysýy» jáne «Memlekettik organdar basshylarynyń sybaılas jemqorlyqqa qarsy is-qımyl jónindegi sharalardy qabyldamaýy» boıynsha 10 ákimshilik materıal toltyrdy. 9 materıal boıynsha jalpy somasy 2,6 mln teńgeden astam aıyppul salynyp, zańsyz kiris - 6,3 mln teńge tárkilendi jáne 1 is sotta qaralyp jatyr.

«Sybaılas jemqorlyqqa qarsy shekteýlerdi monıtorıngileý barysynda jemqorlyqtyń 126 sýbektisiniń joǵaryda kórsetilgen shekteýlerdi buzǵany anyqtaldy. Kóp jaǵdaıda bul Zańmen osyndaı qyzmetti júzege asyrýǵa tyıym salynǵan adamnyń kásipkerlik qyzmetpen aınalysý faktileri. Qazir qyzmetkerler protsessýaldyq sheshim qabyldaý úshin árbir faktini egjeı-tegjeıli zerttep jatyr», - dedi Nurlan Jahın.

Spıker jınalǵandardyń nazaryn ÁQBtK-niń 680 jáne 681-baptaryna – ıaǵnı «memlekettik organdar basshylarynyń sybaılas jemqorlyqqa qarsy is-qımyl jónindegi sharalardy qabyldamaýy» jáne «buryn sybaılas jemqorlyq qylmys jasaǵan adamdardy jumysqa qabyldaý» baptaryna erekshe aýdardy.

Departament 680-bapty buzyp, laýazymdy tulǵalardy aktıvter men mindettemeler týraly deklaratsııany usynbaı taǵaıyndaý faktilerin anyqtady. Búgingi tańda 6 laýazymdy tulǵa jaýapqa tartyldy.

«Basshylar adamdardy jumysqa qabyldaý kezinde sybaılas jemqorlyq qylmysy úshin sottalǵan ba, joq pa – tekserýi kerek, sondaı-aq kandıdattan aktıvteri men mindettemeleri týraly deklaratsııa tapsyrýdy talap etýi qajet. Buryn-sońdy sybaılas jemqorlyq qylmys jasaǵan adam endi memlekettik qyzmette de, kvazımemlekettik sektorda da, tipti qatardaǵy laýazymda jumys isteı almaıdy. Osyndaı tulǵalardy jumysqa qabyldaǵan basshylarǵa 100 AEK kóleminde aıyppul túrinde ákimshilik jaýapkershilik qarastyrylǵan», - dedi Nurlan Jahın.

Byltyr SQO-da sybaılas jemqorlyq qylmys úshin sottalǵandardy jumysqa alǵan eki basshy 100 AEK mólsherinde aıyppul tóledi.

Sondaı-aq, «QR memlekettik qyzmeti týraly» Zańnyń 61-babyna sáıkes ákimshilik sybaılas jemqorlyq quqyq buzýshylyq jasaý memlekettik ákimshilik qyzmetshilerdiń memlekettik qyzmetti toqtatýyna negiz bolady.