SQO-da jem-shóp baǵasyn turaqtandyrý maqsatynda aýyl sharýashylyǵy jármeńkeleri ótip jatyr

PETROPAVL. QazAqparat – Soltústik Qazaqstan oblysynyń aýdan ortalyqtarynda azyq-túlik pen jemazyq baǵasyn turaqtandyrý maqsatynda aýylsharýashylyǵy jármeńkeleri ótip jatyr, dep habarlaıdy QazAqparat tilshisi.

SQO aýdandarynda ár apta saıyn aýylsharýashylyǵy jármeńkeleri uıymdastyrylyp jatyr. Maqsat – halyqty arzan azyq-túlikpen, jemazyqpen qamtý.

Osyndaı jármeńkelerdiń biri Esil aýdany ıAvlenka eldi mekeninde ótti. Turǵyndarǵa 60 tonna shóp, 20 tonna jem jáne 25 tekshe metr otyn usynyldy. Ónim anaǵurlym arzan baǵaǵa saýdaǵa tústi.

ıAvlenka turǵyny Ashat Saǵulovtyń 20 shaqty qoıy, birneshe sıyry bar. Qystan qysylmaı shyǵý úshin oǵan jemnen basqa 4 tonna shóp qajet. Aýylsharýashylyǵy jármeńkesi bolatynyn estip, arnaıy kelipti.

«Bıyl keı fermer men shabyndyǵy bar kásipkerler maýsym, shilde aılarynda bolǵan aptap pen qurǵaqshylyqty syltaýratyp, shóp tapshy dep baǵasyn qymbattatyp jiberdi. Jármeńkedegi baǵa qalta kótererlik. Mundaı baǵamen jem-azyq tabý qazir múmkin emes», - deıdi aýyl turǵyny.

Oblys ákimi Qumar Aqsaqalov ta jármeńkege arnaıy kelip, baǵalardy kórdi. Jem-shópti qymbattatpaý úshin mundaı jármeńkeler óńirde endi jıi ótkizilip turmaq.

«Shóp byltyrǵy baǵamen satylýy kerek. Barlyq shyǵyndy esepke alǵannyń ózinde 15 myń teńgeden asyrýǵa bolmaıdy. Osy baǵany ustaýdy usynamyn. Óńirde bir aılyq mólsherdegi jańbyr jaýyp, eginshilikke zor paıdasyn tıgizdi. Tıisinshe bıyl jemshóp jetispeýshiligi syndy problema bolmaýǵa tıisti.

Oraq naýqany bastalǵannan keıin kórermiz. Oblysty qamtysymen-aq Batys Qazaqstan oblysyna kómek kórsetýdi josparlap otyrmyz. Biraq ony oraq naýqanynyń nátıjesi kórsetedi», - deıdi Qumar Aqsaqalov.