SQO-da jazasyn óteýshiler endi termınal arqyly shaǵymdana alady

PETROPAVL. QazAqparat – Soltústik Qazaqstan oblysynyń túzetý mekemelerinde jazasyn óteýshiler elektrondyq qujat túrinde ótinish berý úshin termınaldar ornatyldy, dep habarlaıdy QazAqparat tilshisi.

SQO boıynsha qylmystyq-atqarý júıesi departamenti baspasóz qyzmetiniń málimetinshe, 2019-2023 jyldarǵa arnalǵan qylmystyq-atqarý júıesin damytýdyń jol kartasy aıasynda ES-164/1,3,6,8,9 mekemelerinde termınaldar qoıyldy.

«Endi sottalǵandar qylmystyq quqyq buzýshylyq bolsa, mekeme qyzmetkerleri ókilettikterin asyra paıdalansa, basqa sottalǵandardyń zańsyz áreketterin kórip, sol týraly prokýrorǵa jáne adam quqyqtary jónindegi ýákilge sondaı-aq kez-kelgen basqa memlekettik organǵa óz betinshe termınal arqyly shaǵymdana alady. Jazasyn óteýshilerdiń esh kedergisiz sotqa ótinish berýine de múmkindik bar», - deıdi SQO boıynsha QAJD bastyǵy Rýstan Ahmetjanov.

Sottalǵandar úshin oblystyń 5 mekemesinde 8 termınal qoljetimdi jerde ornatyldy.

«Termınaldy qoldanýda esh qıyndyq joq. Jazasyn óteýshiler ózderiniń jeke derekterin engizedi, sonymen qatar saýsaq izimen rastaıdy. Osylaısha, sottalǵandar buryn bergen ótinishteri men shaǵymdaryn teksere alady. Shaǵym nemese ótinish berilgennen keıin ony naqtylaý maqsatynda 3 kún ishinde prokýror keledi. Bul jańashyldyq shaǵymdar men ótinishterdi berý barysyn ońtaılandyryp, olardy qysqa merzimde qaraýǵa kómektesedi», - deıdi Rýstan Ahmetjanov.