SQO-da jazasyn óteýshiler at ábzelderin jasaýdy qolǵa aldy
SQO boıynsha Qylmystyq atqarý júıesi departamenti baspasóz qyzmetiniń málimetinshe, jańa óndiris Petropavldaǵy ES-164/3 mekemesinde ashyldy. Ony jeke kásipker uıymdastyrǵan. Tsehta bastapqy kezeńde 4 sottalǵan jumys istese, óndiristiń keńeıýimen qazir qosymsha taǵy eki jazasyn óteýshi eńbekpen qamtyldy.
Taza bylǵarydan jasalǵan júgen, er, toqym, júgen, noqta, shylbyrdyń sapasy joǵary, sondyqtan daıyn ónim suranysqa ıe. At saımandaryn mal sharýashylyǵymen aınalysatyn kásipkerler de, turǵyndar da satyp alyp jatyr.
«Maǵan jumys taýyp bergenderine rahmet aıtamyn. Osylaısha sottyń talabyn oryndap boryshymnan qutylyp jatyrmyn. Artylǵanyn týystaryma jiberemin. Meniń áıelim, úsh balam bar. Jumysym ózime unaıdy. Ári eńbek etkendikten ýaqyt ta tez ótedi. Men bul isti búge-shigesine deıin meńgerip, jaqsy sheber bolýǵa tyrysamyn. Keıin bosap shyqqannan keıin bul is maǵan paıdaly bolýy múmkin», - deıdi jumysshylardyń biri Nıkolaı.
Mekeme qyzmetkerleriniń aıtýynsha, sottalǵandardy túzeýdiń ońtaıly joly –eńbekke tartý.
«Eńbekaqy alýdyń arqasynda sottalǵandar úkim negizinde atqarý paraqtary boıynsha bereshekti óteýge, jaqyn týystaryna materıaldyq kómek kórsetýge, oqshaýlaý jaǵdaıynda da memlekettiń áleýmettik belsendi azamattary bolyp qalýǵa múmkindikteri bar. Eńbekke aralasqan sottalǵan bir sát óziniń bas bostandyǵynan aıyrý oryndarynda júrgenin umytyp, ózin tolyqqandy adam retinde sezinedi, aldyna maqsat qoıyp, kóńil-kúıi jaqsarady», - deıdi SQO boıynsha QAJD bastyǵy Rýstan Ahmetjanov.