SQO-da jazasyn óteýshi shaǵyn qalany nanmen qamtyp otyr
SQO boıynsha qylmystyq atqarý júıesi departamenti baspasóz qyzmetiniń málimetinshe, Shýhrat esimdi sottalǵan M.Jumabaev aýdanynyń probatsııa qyzmeti bóliminiń esebinde tur. Jaqynda er adam mamandardyń kómegimen memlekettik baǵdarlamaǵa qatysyp, kásipkerlik kýrsynan ótti. Keıin halyqty jumyspen qamtý ortalyǵyna óz isin bastaýǵa jeke baǵdarlama ázirlep, jiberdi. Nátıjesinde sottalǵan shaǵyn naýbaıhana ashý úshin memleket tarapynan 200 AEK mólsherinde, ıaǵnı 583 myń teńge grant aldy. Oǵan naýbaıhanaǵa qajet qondyrǵy satyp aldy.
Shýhrattyń jumys kúni tańǵy saǵat 4.00-de bastalady. Ol kúnine 10 saǵatqa deıin jumys isteıdi eken. Qazir ol tandyr, bólke nan pisiredi, ónimderin aýdan dúkenderine jetkizedi.
«Meniń naýbaıhanam M.Jumabaev aýdanynyń ortalyǵy Býlaev qalasynda ornalasqan. Jumys ornym dál úıimniń janynda, yńǵaıly. Bir tandyr nannyń salmaǵy 330 gr, baǵasy 120 teńge, bir bólke nan 550 gr jáne 130 teńge turady. Meniń aı saıynǵy tabysym orta eseppen 100-150 myń teńge shamasynda, keıde odan da kóp shyǵady. Tabysym istegen jumysyma baılanysty. Men únemi jetkizip turatyn 5-6 dúken bar», - deıdi Shýhrat.
Ol bul kásipti SQO boıynsha QAJD ES-164/3 mekemesinde jazasyn ótep júrgen kezde úırengen eken. Mekemeniń naýbaıhanasynda birneshe jyl jumys istegen.
«Shartty túrde merzimimnen erte bosatylǵan soń, shyqqannan keıin óz jeke isimdi ashamyn dep sheshim qabyldadym. Oıymdy mamandarǵa aıtyp edim, olar qoldaý bildirdi. Kóktemde naýbaıhanamdy úlkeıtip, birneshe adamdy jumysqa ornalastyrý josparda bar. Meniń ómirim ózgerdi, sanaly túrde ómir súre bastadym dep nyq senimmen aıta alamyn», - deıdi Shýhrat.